घरपोच सिलिंडर, पण वजनाबाबत अनभिज्ञता !

खामगाव शहरातील वास्तव; ग्राहक जागृती होणे गरजेचे.

खामगाव: सिलिंडरची घरपोच सेवा अनेक कंपन्यांनी सुरू केली आहे; मात्र या सिलिंडरचे अधिकृत वजन व प्रत्यक्षात मिळणारे वजन याची खातरजमा कुणीही करीत नसल्याची बाब ह्यलोकमतह्णने केलेल्या सर्वेक्षणात समोर आली आहे. खामगाव शहरात एका कंपनीच्या दोन एजन्सीकडून शहरातील सुमारे ४५ हजारावर गॅस ग्राहकांना गॅसचे वितरण केले जाते. यामध्ये बहुतांश ग्राहक घरपोच सिलिंडरची मागणी करतात. घरपोच सिलिंडर मिळाल्यानंतर कुणीही या सिलिंडरचे वजन करीत नसल्याचे धक्कादायक वास्तव असल्याने ग्राहकांना सिंलिडरसाठी योग्य ती रक्कम मोजल्यानंतरही नियमानुसार सिलिंडरचे वजन मिळत नसल्याच्या तक्रारी आहेत. घरगुती अनुदानित गॅस सिलिंडरसाठी ४७0 रुपये घेतले जातात. घरगुती गॅसचे वजन १४.६ किलो असते; मात्र अनेकदा सिलिंडरचे वजन कमी भरत असल्याच्या कुरबुरी होतात; मात्र कुणीही तक्रार करण्यास पुढे येत नाही. स्वयंपाकासाठीच्या गॅसच्या किमती व सिलिंडरची र्मयादित संख्या यामुळे सामान्य नागरिकांचा जीव टांगणीला लागला असतानाच गॅसचोरीची एकेक प्रकरणे पुढे येऊ लागली आहेत. गॅस घरपोच देणारा कर्मचारी भरलेल्या सिलिंडरमधून बेमालूमपणे गॅस काढून कमी वजनाचे सिलिंडर देत असल्याचा प्रकार अनेकदा उघड झाला आहे. तर घरगुती गॅस सिलिंडरमधून गॅस काढून तो व्यावसायिक सिलिंडरमध्ये भरुन तसेच वाहनात भरुन जादा दराने विक्री करण्याचे प्रकारही शहरात समोर आले आहेत. त्यामुळे कमी वजनाचा गॅस आपल्या माथी मारुन एजंटने फसवणूक केल्याची नागरिकांची भावना झाली आहे. अगोदरच महागाई त्यात अशा प्रकाराने ग्राहक मेटाकुटीला आले आहेत. त्यामुळे गॅस सिलिंडर देताना त्याचे वजन करून दिले पाहिजे; पण किती एजन्सीज हा नियम पाळतात, हा मोठा प्रश्न आहे. सिलिंडरच्या वजनाबाबत अनेक ग्राहकांशी संवाद साधला असता सर्वांंनीच वजन करीत नसल्याचे सांगितले. ग्राहकांच्या अशा बेपर्वा वृत्तीमुळे एजन्सीधारकांचे फावत आहे. येणार्‍या काळात ग्राहकांनी जागृत राहणे गरजेचे आहे.