पीक कर्जासाठी थेट बँकांनाच देणार शेतक-यांची कागदपत्रे!

बुलडाणा तहसीलदारांचा अभिनव उपक्रम

विवेक चांदूरकरबुलडाणा : खरीप हंगामासाठी पिककर्ज काढताना शेतकर्‍यांना आता तलाठय़ांच्या मागे फिरण्याची गरज राहणार नसून, सातबारासह शेतकर्‍यांची पिककर्जासाठी आवश्यक सर्व कागदपत्रे सरळ बँकांकडे पोहोचविण्यात येणार आहे. बुलडाणा तहसलदारांनी हा निर्णय घेतला कर्जवाटप करणार्‍या बॅकांकडून शेतकर्‍यांची यादी मागविण्यात आली आहे. जून महिन्यामध्ये खरीप हंगामातील पेरणीला प्रारंभ होतो. या हंगामाकसाठी पीक कर्ज घेण्याकरिता मे महिन्यापासून शेतकर्‍यांची लगबग सुरू होते. यासाठी शेतकर्‍यांना तलाठय़ांकडून अद्यावत सातबारा, आठ अ, हैसीयत दाखला यासह विविध कागदपत्रे घ्यावी लागतात. बहुतेक तलाठय़ांकडे दोन ते तीन गावांचा प्रभार असतो. त्यामुळे शेतकर्‍यांना ही कागदपत्रे मिळविण्याकरिता तलाठय़ांच्या मागे चकरा माराव्या लागतात. या दरम्यान शेतकर्‍यांची पिळवणूकही होते. या सर्व प्रकारास आळा घालण्याकरिता तहसीलदार सुरेश बगळे यांनी पुढाकार घेतला असून, तहसीलदारांनी जिल्हा बँक व राष्ट्रीयकृत बँकांना बुलडाणा तहसील अंतर्गत पीक कर्ज घेणार्‍या शेतकर्‍यांची यादी मागविली आहे. शेतकर्‍यांचे सातबारा, आठ-अ व हैसीयतचा दाखला तहसील कार्यालय तयार करणार आहे. संपूर्ण दाखले ई-महासेवा केंद्रावरून काढून ते सरळ बँकांमध्ये पोहोचविण्यात येणार आहे. परिणामी बँकांना शेतकर्‍यांचे अद्ययावत कागदपत्रे एकाच वेळी मिळतील व पीक कर्ज देण्यासाठी सोईचे होईल. राज्यातील पहिलाच प्रयोग! -राज्यात खरीप हंगामात लाखो शेतकरी पीक कर्ज घेतात. शेतकर्‍यांना नवीन कर्ज घेण्याकरिता काही कागदपत्रांची गरज असते. त्याकरिता त्यांना तलाठय़ांच्या मागे फिरून पैसेही द्यावे लागतात. याबाबत अनेकदा शेतकर्‍यांनी तक्रारी दिल्या आहेत. तसेच आंदोलनही केले आहे. मात्र, याची कुणीही दखल घेतली नाही. या शेतकर्‍यांची कागदपत्रे थेट बँकांमध्ये पोहोचविण्याचा बुलडाणा तहसिलदारांचा हा राज्यातील पहिलाच प्रयोग आहे. कागदपत्रांसाठी बनविणार विशेष यंत्रणा! बँकांकडून शेतकर्‍यांची यादी घेऊन त्यांची कागदपत्रे तयार करण्याकरिता तहसील कार्यालयात विशेष यंत्रणा तयार करण्यात येणार आहे. तहसील कार्यालयातील मधील कर्मचारी तथा तलाठय़ांचा यामध्ये समावेश असणार आहे.शेतकर्‍यांना पीक कर्ज घेताना सातबारासह विविध कादगपत्र गोळा करावे लागतात. शेतकर्‍यांचा हा त्रास कमी करण्याकरिता आम्ही सरळ बँकांकडून पीक कर्ज घेणार्‍या शेतकर्‍यांची यादी घेऊन बँकेत कागदपत्र पोहोचविण्याचा निर्णय घेतला आहे. ही कागदपत्रे तयार करण्याकरिता काही कर्मचार्‍यांची नियुक्ती करण्यात येईल. यामुळे शेतकर्‍यांचा त्रास वाचणार आहे. - सुरेश बगळे, तहसीलदार, बुलडाणा