शेतीच्या वादातून हाणामारी

मेहकर आणि मातोळा तालुक्यातील घटनां.

डोणगाव (जि. बुलडाणा): मेहकर तालुक्यातील द्रुगबोरी येथे शेतीच्या वादातून करण्यात आलेल्या मारहाणीत एक जण गंभीर जखमी झाल्याची घटना १ जुलै रोजी घडली. द्रुगबोरी येथील प्रवीण ऊर्फ बाळू रमेश शिंदे व गजानन सुखदेव डाखोरेसह सात जण यांच्यात शेतीच्या वादातून हाणामारी झाली. त्यामध्ये गजानन डाखोरे याने प्रवीण रमेश शिंदे याच्या अंगावर गरम पदार्थ फेकून जखमी केले व जिवे मारण्याची धमकी दिली. त्यामध्ये प्रवीण शिंदे गंभीर जखमी झाले. त्यांच्या तक्रारीवरून आरोपी गजानन सुखदेव डाखोरे, बेबी डाखोरे, नागेश डाखोरे, बाळू भिकाजी डाखोरे, मारोती बंडू इंगळे, राजू नांदे शेषराव आश्रू शिंदे (रा. नागेशवाडी) यांच्याविरुद्ध विविध कलमान्वये पोलिसांनी गुन्हा दाखल केला. पुढील तपास ठाणेदार एस.आर. निचळ यांच्या मार्गदर्शनाखाली करण्यात येत आहे. त्याचप्रमाणे मोताळा तालुक्यातील धामणगाव बढे पोलीस ठाण्याच्या हद्दीतील तपोवन येथे क्षुल्लक कारणावरून दोन गटांत हाणामारी झाल्याची घटना २ जुलैच्या रात्री घडली. परस्परविरोधी फिर्यादींवरून पोलिसांनी दोन्ही गटांविरूद्ध गुन्हा दाखल केला आहे. पोलीस सूत्रांकडून प्राप्त माहितीनुसार, फिर्यादी सुनील कमलाकर पाटील (रा. तपोवन) हे येथील सोपान पाटील यांच्या किराणा दुकानावर गेले असता, किरण प्रभाकर चतारे याने सुनील पाटील यांच्याशी वाद झाला. दरम्यान, सुनील पाटील समजाविण्यासाठी गेले असता, किरण चतारे व त्याचा भाऊ सुधाकर चतारे यांनी संगनमताने सुनील पाटील यांना फायटरने वार करून जखमी केले. सुनील पाटील यांनी पोलीस ठाण्यात तक्रार दिली. यावरून पोलिसांनी किरण चतारे व सुधाकर चतारे यांच्याविरूद्ध भादंविच्या कलम ३२४, ४0५, ३४ नुसार गुन्हा दाखल केला. दुसरीकडे किरण प्रभाकर चतारे यांनी तक्रार दिली की, सोपान पाटील यांच्या किराणा दुकानावर भावाच्या मुलीला घेऊन गेलो असता, उपस्थित सुनील कमलाकर पाटील, जयेश सुनील पाटील, विजय सुनील पाटील व कैलास बाजीराव पाटील यांनी डोक्यात कुर्‍हाडीचा दांडा मारला व घरी येऊन आईला लाथा-बुक्क्यांनी मारहाण केली. तक्रारीवरून पोलिसांनी आरोपींविरूद्ध गुन्हा दाखल केला आहे.