मळणी यंत्रात ओढल्या जाऊन इसम ठार

बुलडाणा जिल्ह्यातील घटना.

बोरखेड (जि. बुलडाणा) : जवळच असलेल्या सगोडा शिवारात ट्रॅक्टरवर चलित मळणी यंत्राने (हळंब) गहू काढत असताना आतमध्ये ओढल्या जावून इसम ठार झाला. ही घटना २१ मार्च रोजी सकाळी ९ वा. घडली. सगोडा ता. संग्रामपूर येथील मोहन बजरंग हागे यांच्या गावालगतच्या शेतात ट्रॅक्टर हळंबमध्ये गव्हाची पेंडी लोटत असताना स्वत: ट्रॅक्टरमालक ज्ञानेश्‍वर गजानन गावंडे (वय ३५) रा.दानापूर ता.तेल्हारा यांच्या डोक्याचा पूर्ण भाग हळंबमध्ये जावून त्यांचा जागेवर मृत्यू झाला. त्यांच्या पश्‍चात पत्नी, मुलगी व दोन महिन्यांचा मुलगा आहे. सोनाळा पोलिसांनी पंचनामा करून शव उत्तरीय तपासणीसाठी वरवट बकाल येथील ग्रामीण रुग्णालयात हलविले. याप्रकरणी पोलिसांनी आकस्मिक मृत्यूची नोंद केली आहे.