लोकमत न्यूज नेटवर्क
बुलडाणा : जिल्ह्यात कोरोना चाचणीसाठी सप्टेंबर महिन्यापासून प्रयोगशाळा सुरू करण्यात आली. या प्रयोगशाळेत दिवसाला साधारण २०० जणांची मिळून आजवर ६७ हजार जणांची कोरोना चाचणी करण्यात आली आहे. त्यापैकी आठ हजारांपेक्षा अधिक लोकांना कोरोना संसर्ग असल्याचे निदान झाले आहे.
देशात कोरोना संसर्गाचा शिरकाव झाल्यानंतर आरोग्य यंत्रणा सतर्क झाली. यासाठी शासनाने लॉकडाऊन आणि जिल्हा सीमाबंदीसह विविध उपाय योजना लागू केल्या. आरोग्य विभागाकडूनही कोरोना संसर्ग नियंत्रणासाठी जनतेत जनजागृती सुरू करण्यात आली.
बुलडाणा जिल्ह्यात मार्च महिन्यात कोरोना संसर्गाचा पहिला रुग्ण आढळून आला. सुरुवातीला बुलडाणा जिल्ह्यात कोरोना चाचणीची सुविधाच नसल्याने संशयित रुग्णांचे नमुने तपासणीसाठी अकोला, अमरावती आणि नागपूर येथील प्रयोगशाळेत पाठविले जात होते. त्यामुळे रुग्णाचा चाचणी अहवाल प्राप्त होण्यास विलंब लागत होता. परिणामी, कोरोनाबाधितांच्या संपर्कातील रुग्णांची चाचणी करणेही अशक्य हाेत होते. या पार्श्वभूमीवर जिल्ह्यातील लोकप्रतिनिधींकडून जिल्ह्यातच कोरोना चाचणीसाठी आरटीपीसीआर प्रयोगशाळा सुरू करण्याची मागणी करण्यात आली.
पालकमंत्र्यांनी बुलडाणा जिल्ह्यात प्रयोगशाळा सुरू करण्यासाठी पाठपुरावा केला. यासाठी लागणाऱ्या तज्ज्ञ मंडळीची पदस्थापना आणि इतर सुविधा उपलब्ध करण्यास निधीही उपलब्ध करून देण्यात आला. त्यामुळे बुलडाणा येथे जिल्हास्तरावर स्त्री रुग्णालयात कोरोना चाचणीसाठी आरटीपीसीआर प्रयोगशाळा सुरू करण्यात आली. या प्रयोगशाळेत १६ फेब्रुवारीपर्यंत एकूण ६७ हजार लोकांची कोरोना चाचणी करणे आरोग्य विभागाला शक्य झाले. यामुळे वेळेत चाचणी होऊन कोरोना संसर्गावर नियंत्रण मिळविणेही शक्य झाले आहे.
सर्वच रिपोर्ट अचूक
जिल्ह्यात आरटीपीसीआर लॅबमध्ये दरदिवशी सरासरी २०० जणांची कोरोना चाचणी केली जात आहे. यात प्रामुख्याने बाधितांच्या संपर्कातील व्यक्तींसह इतर संशयितांचा समावेश आहे. त्यात एकाही चाचणीत दोष आढळून आला नाही किंवा चुकीची असल्याचा प्रकार घडला नाही.
लॅबचा कायम वापर
कोरोना संसर्ग नियंत्रणात येत असून, पुढे जिल्हा कोरोनामुक्त होण्याची शक्यता नाकारता येत नाही. तथापि, कोरोना चाचणीसाठी सुरू केलेली प्रयोगशाळा पुढे कोणत्याही प्राण्यांपासून किंवा डासांपासून होणाऱ्या आजारांसह विविध आजारांच्या निदानासाठी उपयोगात आणली जाणार आहे.
एनआरएचएम कडून मिळाला दीड काेटींचा निधी
जिल्ह्यात कोरोना चाचणी प्रयोगशाळेसाठी एनआरएचमधून दीड काेटी रुपयांचा निधी देण्यात आला. तसेच सर्वसाधारण योजनेतूनही निधी देण्यात आला. प्रयाेगशाळेतील साहित्य खरेदीसाठी लाेकप्रतिनिधींनी आपला निधी दिला हाेता.
जिल्ह्यातील कोरोना चाचणीसाठी बुलडाणा येथे सुरू करण्यात आलेल्या आरटीपीसीआर लॅबमध्ये विविध तज्ज्ञ मिळून जवळपास २४ अधिकारी, कर्मचाऱ्यांचा स्टाफ कार्यरत आहे.