नोकरीचे आमिष दाखवून फसवणूक

नोकरीचे आमिष दाखवून जवळपास ५ लाखाची रक्कम घेवून एका महिलेसह चौघांनी खामगावातून पोबारा केला आहे.

खामगाव : सेक्युरिटी जॉब प्लेसमेंट ऑफीस अकोला येथून नोकरी लावून देतो, असे आमिष दाखवून अनेक बेरोजगार तरुणांकडून प्रत्येकी १0 ते २0 हजार जमा करुन जवळपास ५ लाखाची रक्कम घेवून एका महिलेसह चौघांनी खामगावातून पोबारा केला आहे. या प्रकरणी राजेश रमेश गवळी याचेसह इतर ३२ तरुणांनी स्थानिक शहर पोलिस स्टेशनला फसवणूक झाल्याची तक्रार दिली आहे. स्थानिक धोबी खदान भागातील संतोष एकनाथ गुळभेले, सौ.रुपाली संतोष गुळभेले, एकनाथ गुळभेले व दिनकर देवचे रा.जलंब या चौघांनी संगनमत करुन खामगाव व तालुक्यातील अनेक बेरोजगार तरुणांना नोकरीचे आमिष दाखवून त्यांची फसवणूक केल्याचे तक्रारीत नमूद केले आहे. संतोष गुळभेले हा खामगावात सेक्युरिटी गार्ड म्हणून बँक ऑफ महाराष्ट्र येथे कार्यरत होता. यावेळी त्याचेशी आपली ओळख झाल्याचे राजेश गवळी याने तक्रारीत म्हटले आहे. ओळख झाल्यानंतर संतोष गुळभेले याने अकोला येथील जॉब प्लेसमेंटमधून सेक्युरिटी गार्ड पदाच्या नोकरी निघाल्या आहेत. त्याचे अर्ज भरणे सुरु असून दरमहा ११ हजार ४00 रुपये पगार आहे. त्याकरिता साहेबांना प्रतिव्यक्ती २0 हजार रुपये द्यावे लागतात असे सांगितले. उपरोक्त चौघां.ऩी मिळून खामगाव व परिसरातील ३३ तरुणांकडून जवळपास ५ लाख रुपये घेतले मात्र नोकरी लावून दिली नाही, असे तक्रारीत नमूद केले आहे. सदरची तक्रार शहर पोलिस स्टेशनला देण्यात आली असून ही तक्रार पोलिसांनी चौकशीवर ठेवली आहे.