देऊळगाव राजा: येथील मानसिंगपुरा भागात दहीहंडी पहाण्यासाठी गेलेल्या दोन मुलींच्या अंगावर सिमेंटच्या पिलरसह लोखंडी गॅलरी कोसळून एक मुलगी ठार तर एक मुलगी गंभीर जखमी झाली आहे. ही घटना ७ सप्टेंबर रोजी रात्री साडेआठ वाजेच्या सुमारास घडली.
निदा रशीद खान पठाण (९) असे मृत पावलेल्या मुलीचे नाव असून गंभीर जखमी झालेल्या मुलीचे नाव अल्फिया शेख हाफीज (८) असे आहे. तिच्यावर देऊळगाव राजा ग्रामीण रुग्णालयात प्रथमोपचार करून तातडीने जालना येथे खासगी रुग्णालयात उपचारासाठी हलविण्यात आले असल्याची माहिती देऊळगाव राजा पोलिसांनी दिली आहे.
गोकुळाष्टमीच्या दुसऱ्या दिवशी देऊळगाव राजात दहीहंडीचा कार्यक्रम मानसिंगपुरा आयोजित करण्यात आला होता. रात्री साडेआठ वाजेच्या सुमारास दहीहंडी फोडण्याचा कार्यक्रम सुरू असतांना दहीहांडीसाठी बांधलेल्या दोरीसह एका घराची लोखंडी गॅलरी कोसळून ही दुर्घटना घडल्याचे पोलिसांनी सांगितले. अचानक लोखंडी गॅलरी कोसळल्यामुळे तेथे उपस्थित असलेल्यांनी धावपळ करत सुरक्षीत जागा शोधली.
दरम्यान, नंतर काही जण घटनास्थळी गेले असता या दुर्घटनेची गंभीरता त्यांच्या निदर्शनास आली. मृत पावलेली निदा रशीद खान पठाण आणि गंभीर जखमी झालेले अल्फिया शेख हाफीज या दोघी लोखंडी गॅलरीखाली उभ्या राहून दहीहंडीचा कार्यक्रम पहात होता. त्यादरम्यान अचानक ही दुर्घटना घडली. ज्या घराची ही लोखंडी गॅलरी पडली. ते घर बंद होते. तेथे कोणी रहात नव्हते, असे पोलिस सुत्रांनी सांगितले. दरम्यान या प्रकरणी वृत्त लिहीर्पंत पोलिस ठाण्यात तक्रार दाखल झाली नव्हती.