- विवेक चांदूरकर बुलढाणा - संग्रामपूर तालुक्यातील काकणवाडा बुद्रुक येथील दोन जनावरे चोरून नेणार्यांना पोलिसांनी ११ फेब्रुवारीच्या रात्री २ वाजताच्या दरम्यान पाठलाग करून पकडले. चोरट्यांना अटक करण्यात आली असून, कार जप्त करण्यात आली आहे.
काकणवाडा बुद्रुक येथील शिवशंकर सुरेश सोळंके यांची दोन जनावरे चोरी गेल्याचे त्यांच्या ११ फेब्रुवारीच्या रात्री १.३० वाजताच्या दरम्यान लक्षात आले. चोरट्यांनी जनावरे एम एच २७ ए आर ८९८० क्रमांकाच्या कारमध्ये टाकून घेवून गेल्याची माहिती सोळंके यांना मिळाली. त्यांनी ही माहिती पोलीस पाटील ईंगळे यांना दिली. त्यांनी तामगांव पोलीस स्टेशनला फोन करून माहिती दिली. तामगाव पोलिसांनी ताबडतोब वाहनाचा थरारक पाठलाग करून चांगलवाडी शिवारातून आरोपी सैय्यद इरशाद सैय्यद शकील याला मुद्देमालासह ताब्यात घेतले. दोन जण अंधाराचा फायदा घेऊन पसार झाले. ही कारवाही बिट जमदार अशोक वावगे, वाहन चालक सुनील वावगे यांनी केली. यावेळी काकनवाडा पोलीस पाटील इंगळे उपस्थित होते. आरोपीला तामगाव पोलिसांनी ताब्यात घेतले असून पुढील तपास करत आहेत.
संग्रामपूर तालुक्यात आतापर्यंत जनावरे चोरी जाण्याच्या अनेक घटना घडल्या आहेत. पोलिसांनी पाठलाग करून हिवरखेड येथील आरोपीला मुद्देमालासह चांगलवाडी येथे पकडले. यामुळे तालुक्यातील आतापर्यंत चोरी गेलेल्या जनावरांचा शोध लागण्याची शक्यता आहे. या आरोपींची चाैकशी करून कठोर कारवाइ करावी, जेणेकरून जनावरे चोरीला आळा बसेल, अशी मागणी पशूपालकांनी केली आहे.