आज भेंडवळची घटमांडणी; उद्या होणार अंदाज जाहिर

जळगाव जामोद: विदर्भातील शेतकऱ्यांचे लक्ष लागून असलेल्या सुप्रसिद्ध भेंडवळची घटमांडणी मंगळवारी, ७ मे रोजी संध्याकाळी होत आहे

लोकमत न्यूज नेटवर्कजळगाव जामोद: विदर्भातील शेतकऱ्यांचे लक्ष लागून असलेल्या सुप्रसिद्ध भेंडवळची घटमांडणी मंगळवारी, ७ मे रोजी संध्याकाळी होत आहे. ८ मेरोजी सकाळी जळगाव जामोद तालुक्यातील भेंडवळ येथे सकाळी ५.३० वाजता अंदाज जाहिर करण्यात येणार आहे. पूर्णा नदीच्या काठी वसलेल्या या गावी घटमांडणीची परंपरा सुमारे साडेतीनशे वर्षांपासून सुरू आहे. घटमांडणीचे भाकीत ८ मे रोजी पहाटे चंद्रभान महाराजांचे वंशज पुंजाजी महाराज आणि सारंगधर महाराज हे जाहीर करतील. मंगळवारी अक्षय तृतीयेच्या दिवशी संध्याकाळी गावाबाहेर बस स्टॅन्ड शेजारच्या शेतामध्ये घटाची मांडणी करण्यात येईल. घटामध्ये गहू, ज्वारी, तूर, उडीद, मूग, हरभरा, जवस, तीळ, भादली, बाजरी, तांदूळ, अंबाडी, सरकी, वाटाणा, मसूर, करडी आदी १८ प्रकारचे धान्य ठेवण्यात येते. गटाच्या मध्यभागी मातीची ढेकळे त्यावर पाण्याने भरलेली घागर,पानसुपारी, पुरी, पापड, खांडोळी, कुरळी हे खाद्यपदार्थही ठेवले जातात. रात्रभर कोणीही या ठिकाणी थांबत नाही. दुसºया दिवशी पहाटे गटांमध्ये झालेल्या बदलावरून त्याचे सूक्ष्म निरीक्षण केल्यानंतर भाकित वर्तवण्यात येते. यावरून शेतकरी पिकांचा आणि पावसाचा अंदाज वर्तवतात. कोणत्या महिन्यात पाऊस जास्त तर कोणत्या महिन्यात पाऊस कमी सांगितला आहे यावरून शेतकरी यंदा कोणत्या पिकाची पेरणी करावी हे ठरवत असतात. चंद्रभान महाराजांच्या वंशजांनी भेंडवड घटमांडणीची परंपरा कायम ठेवली आह.े पुंजाजी महाराज, शारंगधर महाराज आजही ही परंपरा जोपासत असून नियम पाळतात व घटमांडणी करून भाकिते सांगतात. शेतकऱ्यांचा यावर दृढ विश्वास आहे. गुढीपाडव्याच्या दिवशी सुद्धा गावातील हनुमान मंदिराच्या पारावर पूर्व मांडणी केली जात. या दोन्हींनी मांडणीमध्ये साम्य असते. त्यामुळे या दोन्ही मांडणीचे निकस एकत्र जोडून हे भाकिते वर्तविली जातात. तेव्हा भविष्यात काय दडले आहे, यावर्षी पाऊस कसा असेल? राजकीय परिस्थिती काय राहील, राजा कोण होईल यासारख्या अंदाजाकडे शेतकºयांचे लक्ष लागून आहे.