तलाठी व मंडळ अधिका-याविरुद्ध लाचलुचपत प्रतिबंधक विभागाची कारवाई

लोणार तालुक्यातील प्रकार.

लोणार (जि. बुलडाणा) : वडिलोपार्जीत जमीन वाटणी पत्रकाद्वारे भावाच्या नावाने करून देण्यासाठी शेतकर्‍याकडून पैशाची मागणी करणारे मंडळ अधिकारी, तलाठी आणि इसम तिघेही लाचलूचपत विभागाच्या जाळ्यात सापडले आहेत. तालुक्यातील हिवराखंड येथील रवींद्र कुंडलीक कन्हारे वय २६ यांचे वडील कुंडलीक रोडूजी कन्हारे हे वयोवृद्ध असून, त्यांच्या नावावर हिवराखंड शिवारात शेत सर्व्हे क्र. ३५ मध्ये 0.२६ हे.आर. शेत सर्व्हे नं.१0६ मध्ये 0.४0 हे.आर., शेत सर्व्हे नं.६३ मध्ये 0.९४ हे.आर., शेत सर्व्हे नं.३४ मध्ये ७0 आर., शेत सर्व्हे नं.३७ मध्ये 0.३२ हे.आर. तसेच आई नर्मदाबाई कुंडलीक कन्हारे यांच्या नावावर शेत सर्व्हे नं.१0६ मध्ये ४0 आर, शेत सर्व्हे नं.३४ मध्ये 0.७0 आर. शेतजमीन आहे. आईवडील दोन्हीही वयोवृद्ध आहेत. यापैकी वडील कुंडलीक कन्हारे यांच्या नावावरील सर्व्हे नं.१0६ मधील 0.४0 आर आणि सर्व्हे नं.६३ मधील 0.९४ आर जमीन रवींद्र कन्हारे यांचे लहान भाऊ सुनील यांच्या नावे वाटणीपत्रकाद्वारे करून देण्यासाठी तलाठी एम.आर.राठोड यांनी रवींद्र यांना पाच हजार रुपये तर मंडळ अधिकारी नारायण राठोड यांनी ४ हजार रुपये तसेच खासगी इसम तुळशिराम यांनी तीन हजार रुपये लाच मागितली होती. याबाबत रवींद्र कन्हारे यांनी लाचलुचपत प्रतिबंधक विभागाकडे तक्रार दिली. त्यावरुन पोलीस अधीक्षक एस.एल.मुंढे यांच्या मार्गदर्शनाखाली पोलीस निरीक्षक एस.बी.भाईक, पी.बी.खंडारे, सहा.पो. निरीक्षक भांगे, पोहेकाँ शेकोकार, पो.ना. गडाख, चोपडे, ठाकरे, शेळके, सोळंके, पोकॉं वारुळे, यादव, पो.ना.ढोकणे यांनी ३0 मार्च रोजी सायंकाळी तलाठी कार्यालय बिबी येथे बिबी येथे सापळा रचून पंचासमक्ष लाच मागणीबाबत पडताळणी केली. यावेळी मंडळ अधिकारी नारायण राठोड, तलाठी एम.आर.राठोड आणि खासगी इसम तुळशिराम या तिघांनी अनुक्रमे ४ हजार, ५ हजार आणि ३ हजार असे एकूण १२ हजार रुपयांची लाच मागितल्याचे निष्पन्न झाले. त्यावरुन १ एप्रिल रोजी मंडळ अधिकारी, तलाठी व अन्य १ इसम या तिघांवरही लाचलुचपत विभागाकडून कारवाई करण्यात आली.