साखरखेर्डा : भरधाव दुचाकीला अज्ञात वाहनाने धडक दिल्याने एक जण जागीच ठार तर तीन जण गंभीर जखमी झाले. ही घटना ३ एप्रिल राेजी रात्री देऊळगाव राजा नजीक घडली. योगेश उत्तम जाधव (वय २७ रा. साखरखेर्डा ) असे मृतकाचे नाव आहे़.
साखरखेर्डा येथील प्रताप विष्णू कोरडे, गणेश नामदेव धनवटे, योगेश उत्तम जाधव हे तिघे चार दिवसांपूर्वी साखरखेर्डा येथून छत्रपती संभाजीनगर येथे गेले होते. ३ एप्रिल रोजी सायंकाळी तेथून परत निघाले असता सोबत विशाल काळे या युवकाला सोबत घेऊन निघाले.
एकाच मोटारसायकलवर चौघे येत असताना एका अज्ञात वाहनाने त्यांच्या दुचाकीला जबर धडक दिली. या अपघातात साखरखेर्डा येथील योगेश उत्तम जाधव हा युवक जागीच ठार झाला, तर विशाल काळे, प्रताप कोरडे, गणेश धनवटे हे तिघे गंभीर जखमी झाले. त्यांना तातडीने संभाजीनगर येथे हलविण्यात आले आहे.