खामगाव (बुलढाणा) : घराच्या बांधकामावरून शेजारी कुटुंबामध्ये झालेल्या वादातून हाणामारीची घटना जळगाव जामोद तालुक्यातील जामोद येथे शनिवारी सकाळी घडली. याप्रकरणी परस्परविरोधी तक्रारीवरून दोन्ही कुटुंबांतील आठजणांवर जळगाव पोलिसांनी गुन्हे दाखल केले.
याप्रकरणी जामोद येथील गोपाल मनोहर अवचार (४५) यांनी पोलिसांत तक्रार दिली. त्यानुसार आरोपीच्या घराचे बांधकाम करताना गॅलरी घराला लागण्याच्या मुद्द्यावर त्यांना हटकले असता शिवीगाळ करून मारहाण केल्याचे म्हटले. त्यावरून पोलिसांनी शुभम बबन अवचार, विक्की बबन अवचार, उषा बबन अवचार (तिन्ही रा. जामोद, ता जळगाव जा), शीतल उर्फ राणी संतोष धामोळे (रा. मालठाणा, ता. आकोट, जि. अकोला) या चौघांवर भादंविच्या कलम ३२४, ४५२, ३२३, ५०६, ३४ नुसार गुन्हे दाखल केले. तर दुसऱ्या गटातील उषा अवचार यांनी दिलेल्या तक्रारीनुसार बांधकाम करण्यासाठी आखणी करताना आरोपीने तुझ्या जागेतच बांधकाम कर, अतिक्रमणाच्या जागेत घर बांधू नको, असे म्हटले. त्यावेळी जागेतच घर बांधणार, असे म्हटल्यावरही आरोपी गोपाल मनोहर अवचार याने मुलाला मारहाण केली. तसेच इतर आरोपी नलिनी गोपाल अवचार, नंदा मनोहर अवचार, गायत्री गोपाल अवचार यांनी मुलीला मारहाण केल्याचे म्हटले. त्यावरून पोलिसांनी भादंविच्या कलम ३२४, ४५२, ५०४, ५०६, ३४ नुसार गुन्हे दाखल केले आहेत. पुढील तपास पोलिस करीत आहेत.