लोकमत न्यूज नेटवर्क
भंडारा : कोविडला प्रतिबंध घालण्यासाठी प्राधान्याने विद्यार्थ्यांसह सर्व शिक्षकांचे तातडीने लसीकरण करण्यात यावे, अशी मागणी भंडारा जिल्हा मुख्याध्यापक संघाने शासनाकडे केली आहे.
नवीन वर्षातही कोरोना जिल्ह्यात पसरत आहे. जिल्ह्यात पाचवी ते बारावीपर्यंतचे वर्ग सुरु झाले आहेत. सद्यस्थितीत शहर व खेड्यांमध्ये कोरोनाची धास्ती अधिक वाढली आहे. अशा परिस्थितीत मानसिकदृष्ट्या विद्यार्थी व शिक्षक सुदृढ राहावा तसेच मनात असणारी भीती व्हावी, यासाठी प्राधान्याने विद्यार्थी व सर्व शिक्षकांना मोफत लसीकरण करण्यात यावे. कारण पुढील महिन्यात दहावी व बारावीच्या परीक्षा घेतल्या जाणार आहेत. भीतीमुक्त वातावरणात परीक्षा होण्यासाठी विद्यार्थी व शिक्षकांचे लसीकरण होणे आवश्यक आहे. या संदर्भातील निवेदन मुख्यमंत्री उद्धव ठाकरे, उपमुख्यमंत्री अजित पवार, शालेय शिक्षणमंत्री वर्षा गायकवाड, शालेय शिक्षण राज्यमंत्री बच्चू कडू तसेच प्रशासनातील आयुक्त (शिक्षण), शिक्षण संचालक, पुणे, शिक्षण उपसंचालक, नागपूर यांना शिक्षणाधिकारी (माध्यमिक) जिल्हा परिषद, भंडारा यांच्यामार्फत पाठविण्यात आले आहे. आतापासून उन्हाळ्याच्या झळा सुरु झाल्या आहेत. एप्रिल महिन्यात उन्हाळा त्रासदायक राहणार आहे. त्यामुळे दहावी व बारावी परीक्षेची वेळ सकाळी ९ ते १२ अशी करण्यात यावी तसेच सुरु असणारे वर्ग सकाळ सत्रात भरविण्यासंबंधीच्या सूचना तत्काळ देण्यात याव्यात, अशी मागणी करण्यात आली आहे.
दहावी व बारावीच्या परीक्षा लेखी पद्धतीने घेण्यात याव्यात, दहावी व बारावीच्या विद्यार्थ्यांना ५० टक्के अंतर्गत गुण देण्यात यावेत, शाळा पातळीवरून गुण देण्याचे नियोजन शिक्षण विभागाला करण्याचे निर्देश शासनाने तातडीने द्यावेत तसेच सध्या कोरोनाचा काळ सुरु असल्याने परीक्षा व त्याचे मूल्यमापन कसे करावे, या गोंधळात शिक्षक सापडले आहेत. पाचवी ते नववी व अकरावी या वर्गांच्या लेखी परीक्षा व अंतर्गत मूल्यमापन याबाबत स्पष्टता करण्यात यावी, अशी मागणी भंडारा जिल्हा मुख्याध्यापक संघाचे अध्यक्ष राजकुमार बालपांडे, सचिव राजू बांते, उपाध्यक्ष प्रमोद धार्मिक, रेखा भेंडारकर, सहसचिव अर्चना बावणे, कोषाध्यक्ष राधेश्याम धोटे, विष्णूदास जगनाडे, गोपाल बुरडे, सुनीता तोडकर, कुंदा गोडबोले, रवी मेश्राम, विपीनचंद्र रायपूरकर, अतुल बारई, राजू भोयर, सुनील गोल्लर, अनमोल देशपांडे, जी. एन. टीचकुले, प्रदीप मुटकुरे, दामोदर काळे आदींनी केली आहे.