महारेशीम अभियानाला उत्स्फूर्त प्रतिसाद

महाराष्ट्रात रेशीम उद्योगाचा विकास तळागाळातील, खेडयातील शेतकऱ्यांना माहिती व्हावा, या उद्देशाने महारेशीम अभियान राबविण्याचा निर्णय घेतला आहे.

चित्रमय रथाचे आयोजन : पवनी, लाखांदूर तालुक्यात जनजागृतीभंडारा : महाराष्ट्रात रेशीम उद्योगाचा विकास तळागाळातील, खेडयातील शेतकऱ्यांना माहिती व्हावा, या उद्देशाने महारेशीम अभियान राबविण्याचा निर्णय घेतला आहे. तुती रेशीम व टसर रेशीम सुरू असलेल्या गावांगावात सुरू करण्यात आले. भंडारा जिल्ह्यात रेशीम चित्रमय रथ तयार करण्यात आला असून त्या चित्ररथाला पवनी, लाखनी, साकोली, लाखांदूर तालुक्यातील २३ गावांमध्ये उत्सफूर्त प्रतिसाद मिळाला. या अभियानांतर्गत गावात रेशीम तुती व टसर रेशीम उद्योगाबाबत माहिती ग्रामपंचायत, समाज मंदिरामध्ये सभा घेऊन माहिती देण्यात आली. सदर अभियान २५ मार्चपर्यंत कार्यरत राहणार आहे. भंडारा जिल्ह्यात तुती व रेशीम उद्योगासाठी लाखांदूर व पवनी तालुक्यातील चौरास पट्टयात गावांमध्ये मासळ, खैरी, घरतोडा, मोहरणा या गावातील ३० लाभार्थ्यांची ईच्छुक आहेत. आसगाव, मांगली, विरली खंदार, भेंडाळा येथील २० लाभार्थी असे ५० एकर क्षेत्रात तुती लागवडीसाठी नोंदणी होणार आहे. महाराष्ट्र ग्रामीण रोजगार हमी योजनेमध्ये जमीन तयार करण्यापासून, सरीवरंबा तयार करणे, तुती रोपे लागवड, आंतरमशागत, खते, औषध देणे तुती बागेस पाणी देणे, तुती छाटणी, गळ फांद्या काढणे या कामासाठी तीन वर्षे मिळून ६८२ मनुष्य दिवसांचे १,३०,९४४ रूपये आणि तुती रोपे किटक संगोपन आवश्यक साहित्य जसे चंद्रिका, ट्रे नॉयलॉन जाळी, जैवीक खते, पोषक औषधी, ब्रशकटर, स्प्रे पंप व निर्जंतुकी औषधासाठी तीन वर्षात मिळून ६१,७३० रूपये असे एकूण १,९२,६७४ रूपयांचे अनुदान एका लाभार्थ्यासाठी एक एकरासाठी आहे. रोजगार हमी योजनेमध्ये किटक संगोपनगृह बांधकामासाठी १००० वर्गफुटासाठी ८९,९४६ हजार रूपये ६०० वर्गफुटासाठी ५९,०६८ हजार तर २२५ वर्गफुटासाठी ३२,७४० रूपयांचे अनुदान देण्यात येते. जिल्ह्यातील लाभार्थींनी महारेशीम अभियानाचा लाभ घ्यावा व जास्तीतजास्त लोकांनी रेशीम उद्योगाकडे वळावे, असे आवाहन रेशीम विकास अधिकारी सी. के. बडगुजर यांनी केले आहे. (नगर प्रतिनिधी)उद्योगासाठी मिळणार जमीनटसर रेशीम उद्योगासाठी साकोली तालुक्यातील किटाळी समुहामध्ये बरडकिन्ही, मिरेगांव, गिरोला, चिचगांव, मुंडीपार या गावामध्ये शिबिर घेण्यात आले. यावेळी गिरोला येथे जिल्हा रेशिम अधिकारी सी.के. बडगुजर व सरंपच मनिषा नागलवाडे यांनी मागदर्शन केले. पवनी तालुक्यातील नांदीखेडा, कन्हाळगाव, चांदी, ढोरप, ठाणेगाव या गावांमध्ये रेशीम उद्योगाचे शिबिर घेण्यात आले. यावेळी चांदी येथील लाभार्थ्यांना वरिष्ठ तांत्रिक सहाय्यक व्ही.पी. रायसिंग व वनरक्षक हटकर यांनी मार्गदर्शन केले. या दोन्ही तालुक्यात या अभियानास उत्स्फूर्त प्रतिसाद मिळाला. यासाठी वनविभागाकडून सहकार्य मिळत आहे. निवड केलेल्या गावांमध्ये वनसमितीमार्फत ठराव घेऊन गावालगत उपलब्ध असलेले जंगल टसर रेशीम उद्योगासाठी लाभार्थ्यांना उपलब्ध करून देण्यात येईल.