लोकमत न्यूज नेटवर्कभंडारा : साकोली तालुक्यातील विर्शीफाट्याजवळ महामार्गावर प्रवासी घेऊन साकोलीच्या दिशेने येणारी भरधाव निघालेली बस ट्रॅक्टरवर आदळली. त्यात ट्रॅक्टरचालकाचा जागीच मृत्यू झाला. सदर अपघात सकाळी १०:३० वाजतादरम्यान घडला. लेखचंद गोपीचंद कापगते (५०, विर्शी), असे मृत ट्रॅक्टरचालकाचे नाव आहे.
साकोली तालुक्यातील विर्शी येथील लेखचंद कापगतेहा ट्रॅक्टर घेऊन साकोलीकडे जात असतांना विर्शी फाट्यावरून एमएच ४० एल ८८७२ क्रमांकाची बस प्रवासी घेऊन साकोलीकडे निघाली होती. दरम्यान, बसचालक विकास लाडे (मुरारटोली, गोंदिया) याने बसपुढे असलेल्या ट्रॅक्टर ट्रॉलीला मागेहून धडक दिली. यात ट्रॅक्टरचालकाचा मृत्यू झाला.
प्राप्त माहितीनुसार, सदर बस नागपूर डेपोची असून गोंदिया येथून नागपूरला जात होती. अपघाताची माहिती साकोली पोलिसांना मिळताच हवालदार पूनम जांभूळकर यांनी आपल्यासहकाऱ्यांसह घटनास्थळ गाठून ट्रॅक्टरचालकाला उपजिल्हा रुग्णालय साकोली येथे नेले. तिथे डॉक्टरांनी तपासून मृत घोषित केले. घटनेची नोंद साकोली पोलिसात झाली असून तपास घेतला जात आहे.