लोकमत न्यूज नेटवर्कअमरावती : श्री शिवाजी शिक्षण संस्थेद्वारा संचालित डॉक्टर पंजाबराव देशमुख विधी महाविद्यालयातील एकाच वेळी सात विद्यार्थी न्यायाधीशपदी निवडले गेले आहेत. एमपीएससीमार्फत घेतली जाणारी न्यायदंडाधिकारी प्रथम श्रेणी व दिवाणी न्यायाधीश कनिष्ठ स्तर या परीक्षेसाठीचे सर्व टप्पे उत्तीर्ण करून विद्यार्थ्यांनी हे यश संपादन केले.न्यायाधीशपदासाठी निवड झालेल्या विद्यार्थ्यांची गुणानुक्रमे नावे अशी - महेश पदवाड, स्मिता उके, गौरव तराळ, निकिता पाचडे, सुप्रिया देशमुख, दीपिका उपाध्याय व नरेश उताणे. श्री शिवाजी शिक्षण संस्थेचे अध्यक्ष हर्षवर्धन देशमुख यांच्या मार्गदर्शनात डॉ. पंजाबराव देशमुख विधी महाविद्यालयातर्फे न्यायाधीश पदासाठीचे एमपीएससी कोचिंग सेंटर सुरू करण्यात आले आहे. या कोचिंग सेंटरचे संचालक राजेश पाटील हे आहेत. राजेश पाटील यांनी त्यांच्याकडून पूर्वपरीक्षा, मुख्य परीक्षा व मुलाखत अशी तीन टप्प्यांची परिपूर्ण तयारी करून घेतली. यंदा या परीक्षेला डॉ. पंजाबराव देशमुख विधी महाविद्यालयाच्या एमपीएससी कोचिंग सेंटरवरून १८ विद्यार्थ्यांनी पूर्वपरीक्षेसाठी नोंद केली होती. यामधून १४ विद्यार्थी मुख्य परीक्षेसाठी पात्र ठरले. नऊ विद्यार्थी मुख्य परीक्षा उत्तीर्ण झाले. यापैकी सात जणांनी मुलाखत यशस्वी करून अंतिम यादीत स्थान पटकावले.प्रभारी प्राचार्य प्रणय मालवीय प्राध्यापक वृंद व संस्था संचालक, कर्मचारी यांनी विद्यार्थी आणि महाविद्यालयाने मिळविलेल्या यशाबद्दल समाधान व्यक्त केले.राजेश पाटील यांचे प्रयत्न फळालाएकाच महाविद्यालयातून एका वेळी सात न्यायाधीश राज्याला मिळणे ही अमरावती जिल्ह्यासाठी बहुमानाची बाब ठरली आहे. २०१० साली न्यायाधीशपदाची परीक्षा उत्तीर्ण झालेले; पण तरीही न्यायाधीश घडविण्यासाठी कार्यरत असलेले प्राध्यापक राजेश पाटील यांच्या कौशल्यपूर्ण प्रयत्नांनी महाविद्यालयाला हे यश संपादन करता आले.
‘शिवाजी’च्या विधी महाविद्यालयाचे सात विद्यार्थी न्यायाधीश!
By लोकमत न्यूज नेटवर्क | Updated: December 23, 2019 05:01 IST