२३ शिक्षकांचे वेतन द्या : खंडविकास अधिकाऱ्यांना निवेदनभंडारा : तालुक्यातील २३ प्राथमिक शिक्षकांचे माहे एप्रिल २०१४ चे वेतन प्रलंबित आहे. त्यामुळे पाल्यांचे शिक्षण कौटुंबिक आरोग्य व आर्थिक यंत्रणा अडचणीत आली आहे. प्रलंबित वेतन तातडीने अदा करण्यात यावे, यासह अन्य मागण्यांसाठी शनिवार रोजी प्राथमिक शिक्षक संघ तालुका शाखेच्या पदाधिकाऱ्यांनी येथील पंचायत समितीसमोर धरणे आंदोलन केले. शिष्टमंडळाने खंडविकास अधिकाऱ्यांना निवेदन सोपविल्यानंतर आंदोलनाची सांगता करण्यात आली.पंचायत समिती भंडारा अंतर्गत जिल्हा परिषद प्राथमिक शिक्षकांचे माहे एप्रिल २०१४ चे वेतन प्रलंबित होते. प्रलंबित वेतन महाराष्ट्र राज्य प्राथमिक शिक्षक संघाच्या प्रयत्नाने दि. २२ जून २०१४ ला अदा करण्यात आले. परंतु शालार्थ वेतन प्रणालीचे कारण दाखवून निवडक २३ शिक्षकांचे माहे एप्रिल २०१४ चे वेतन अदा करण्यात आले नाही. खंडविकास अधिकारी व गटशिक्षणाधिकाऱ्यांशी शिक्षक संघाने अनेकदा चर्चा केली. सदर शिक्षकांचे वेतन अदा करण्यात येत नसल्यामुळे शिक्षकांच्या पाल्यांचे शिक्षण कौटुंबिक आरोग्य व आर्थिक यंत्रणा अडचणीत आली असून शिक्षकांची मानसिक स्थिती बिघडली आहे. २३ शिक्षकांच्या प्रलंबित वेतन अदा न केल्यास प्राथमिक शिक्षक संघ तालुका शाखा भंडाराच्या वतीने दि. ६ जुलैपासून पंचायत समितीचे कार्यालयासमोर उपोषण करण्याचा इशारा देण्यात आला आहे. आंदोलनात शिक्षक नेते दिलीप बावनकर, जिल्हाध्यक्ष मुबारक सय्यद, तालुकाध्यक्ष दिलीप बागडे, सरचिटणीस प्रभू तिघरे, वामन ठवकर, रमेश मदारकर, नामदेव गभणे, अशोक भुरे, प्रमोद कळंबे, सुधीर वाघमारे, श्रावण हजारे, विरेद्र निंबार्ते यांच्यासह तालुक्यातील बहुसंख्य शिक्षक सहभागी झाले होते. (नगर प्रतिनिधी)
प्राथमिक शिक्षकांचे धरणे आंदोलन
By admin | Updated: July 5, 2014 23:25 IST