संचालक मंडळाकडून रक्कम वसुलीचे आदेश

भंडारा जिल्हा सेवानिवृत्त कर्मचारी सहकारी पतसंस्था मोहाडी येथील संचालक मंडळाने सन २००५-२००६ ते २०११ - २०१२ पर्यंत कर्ज वसुली आणि आवर्त ठेव रक्कम जमा करण्याकरिता ...

तुमसर : भंडारा जिल्हा सेवानिवृत्त कर्मचारी सहकारी पतसंस्था मोहाडी येथील संचालक मंडळाने सन २००५-२००६ ते २०११ - २०१२ पर्यंत कर्ज वसुली आणि आवर्त ठेव रक्कम जमा करण्याकरिता तीन टक्के कमिशनची २७ लाख १७ हजार ९९९ रुपयांची उचल केली होती. माजी सचिवांनी मानधनापोटी २ लाख ३६ हजार ५०० रुपये उचलले. संचालक मंडळ व सचिवाकडून एकूण २९ लाख ५४ हजार ४९९ रुपये वसूल पात्र ठरविण्याचे आदेश सहाय्यक निबंधकांनी दिले आहेत. भंडारा जिल्हा सेवानिवृत्त कर्मचारी सहकारी पतसंस्था मोहाडीचे सभासद वाय.एस. देशभ्रतार रा. तुमसर यांनी तीन वर्षापूर्वी विभागीय सहनिबंधक, नागपूर तथा सहाय्यक निबंधक, तुमसर यांचेकडे तक्रार केली होती. तक्रारीनुसार पतसंस्थेच्या संचालक मंडळाने सन २००५-२००६ ते २०११-२०१२ पर्यंत कर्ज वसुली आणि आर.डी. (आवर्त ठेव) रक्कम जमा करणे याकरिता ३ टक्के कमीशन उचल केली. ही कृती नियमबाह्य स्वरुपाची आणि सहकारी कायद्यातील व संस्थेच्या उपविधीतील तरतुदींशी विसंगत आहे. या अपकार्यामुळे पतसंस्थेचे आर्थिक नुकसान झाले आहे. या पतसंस्थेच्या माजी सचिवाने मानधनापोटी २ लाख ३६ हजार ५०० उचल केली होती. या प्रकरणाचे प्राधिकृत चौकशी अधिकारी म्हणून सहाय्यक निबंधक पी.डब्लू. भानारकर यांची नियुक्ती करण्यात आलेली होती. महाराष्ट्र सहकारी संस्था अधिनियम १९६० चे कलम ८३ चौकशी प्रकरणास अधिन राहून महाराष्ट्र सहकारी संस्था अधिनियम १९६० चे कलम ८८ नुसार माजी सचिवाच्या स्थावर व अस्थावर मालमत्तेमधून २ लाख ३६ हजार ५०० रुपये तात्काळ वसुल करण्याचे आदेश दिले. कमिशनपोटी संचालक मंडळाने उचल केलेली रक्कम २७ लक्ष १७ हजार ९९९ रकमेसोबत जबाबदारी निश्चित करून वसुल पात्र ठरविण्यात आली. सहकारी पतसंस्थेचे दरवर्षी अंकेक्षण होते. तसा अहवाल विभागीय उपनिबंधकांना सादर करावा लागतो. हे प्रकरण सन २००५-२००६ ते २०११-२०१२ मधील आहे. येथे होणाऱ्या अंकेक्षण अहवालावरच प्रश्नचिन्ह उपस्थित होत आहे. तालुका स्तरापासून विभागीय स्तरापर्यंत अधिकारी आहेत. काटेकोरपणे आणि नियमानुसार अंकेक्षण करणाऱ्या संबंधित अधिकाऱ्यांकडे तक्रार पोहोचल्यानंतर प्रकरणातील सत्य उघडकीस आले आहे. (तालुका प्रतिनिधी)