भंडारा : एक अल्पवयीन मुलीचे अपहरण करुन तिच्यावर अत्याचार केल्याची घटना दिघोरी मोठी पोलीस ठाण्याच्या हद्दीत उघडकीस आली आहे. तरुण आणि मुलीला गोंदिया रेल्वे स्थानकावरुन ताब्यात घेण्यात आले असून तरुणाला अटक करण्यात आली आहे.
प्रशांत प्रभाकर लोणारे (२५) रा. नवेगाव (ब्रह्मी) ता. पवनी असे अटक करण्यात आलेल्या आरोपीचे नाव आहे. लाखांदूर तालुक्यातील एका १३ वर्षीय मुलीचे अपहरण झाल्याची तक्रार चार दिवसांपुर्वी दिघोरी मोठी पोलीस ठाण्यात देण्यात आली होती. तपास सुरू केला असताना अल्पवयीन मुलगी एका तरुणासोबत गोंदिया रेल्वे स्थानकावर आढळून आली. दोघांनाही ताब्यात घेऊन पोलीस ठाण्यात आणले. विचारपूस केली असता अत्याचार केल्याचे पुढे आले.
आरोपीने महिनाभरापासून जंगल परिसरात आपल्यावर अत्याचार केल्याचे मुलीने सांगितले. मुलीच्या वडीलांची तक्रार व वैद्यकीय अहवालवरुन अपहरण व बाल लैंगिक अत्याचार प्रतिबंधक कायद्यांतर्गत गुन्हा नोंद करण्यात आला आहे. याप्रकरणी आरोपी प्रशांतला दिघोरी मोठी पोलिसांनी अटक केली. ठाणेदार हेमंत पवार यांच्या मार्गदर्शनात पोलीस उपनिरीक्षक ग्यानीराम गोबाडे तपास करत आहे.