लाखांदूर : हस्तरेषा पाहून उदरनिर्वाह करण्याच्या परंपरागत व्यवसायातही त्याने शिक्षणाचे वेड जोपासले. प्रचंड इच्छाशक्तीच्या बळावर तो पदवीचे शिक्षण घेत असतांनाच एमएससीआयटी प्रमाणपत्र परीक्षा उत्तीर्ण होऊन नाथजोगी समाजातील पहिला संगणक प्रमाणपत्र धारक ठरला आहे. ही यशोगाथा आहे लाखांदूर तालुक्यातील कोदामेढी येथील कार्तिक मोहनलाल वडस्कर (२४) नामक नाथजोगी युवकाची.
नाथजोगी समाजात जन्मलेल्या या युवकावर बालपणात गावोगावी भटकून भिक्षा मागण्याचे वंशपरंपरागत संस्कार होत असतानाच त्याला शिक्षणाची आवड निर्माण झाली. ही आवड जोपासताना त्याला कुटुंबीयांनीदेखील सहकार्य केले. रुढी परंपरांच्या जोखड़ातून बाहेर पडताना त्याने बालविवाह न करता या समाजात जागृतीचे जणू पहिले पाऊल टाकले. सध्या तो बी.ए.पदवी चे दुसऱ्या वर्षाचे शिक्षण घेत असून नुकताच एमएससीआयटी संगणक परीक्षा उत्तीर्ण झाला आहे. त्याने अनेकदा पालावरची शाळा भरवून या समाजातील लहान मोठ्यांना शिक्षणाचे धडे देणे सुरू केले आहे. वर्षानुवर्षापासून परंपरागत व्यवसाय, अनिष्ठ रूढीपरंपरांना मूठमाती देत या युवकाने शिक्षणाचे वेड जोपासत स्वत:समाजात शैक्षणिक क्रांतिसाठी धडपड करून नाथजोगी समाजाला विकासाच्या मुख्य प्रवाहात आणण्यासाठी प्रयत्नरत या युवकाला शासन प्रशासनाच्या पुढाकाराची गरज असल्याचे सर्वत्र बोलले जात असून त्याचे कौतुकही केले जात आहे.