लोकमत न्यूज नेटवर्क
भंडारा : ऑल भंडारा जिल्हा असोसिएशन, भंडारातर्फे रविवारी येथील छत्रपती शिवाजी महाराज क्रीडा संकुलात राज्यस्तरीय वुशू स्पर्धेसाठीची निवड चाचणी तथा जिल्हास्तरीय स्पर्धा घेण्यात आली. या स्पर्धेचे उद्घाटन माईन्डस आय इंटरनॅशनल स्कूलचे मुकेश थानथराटे, जिल्हा क्रीडा कार्यालय येथील क्रीडा मार्गदर्शक भोजराज चौधरी यांच्या प्रमुख उपस्थितीत करण्यात आले. या स्पर्धेत तुमसर, पवनी, साकोली, भंडारा येथील खेळाडूंनी प्रत्यक्ष भाग घेत विजय मिळवला. ही स्पर्धा सबज्युनियर, ज्युनियर आणि सीनियर मुले-मुली अशा तीन गटात स्पर्धकांच्या वजनानुसार घेण्यात आली. या स्पर्धेतील प्रथम क्रमांकप्राप्त खेळाडूंना अमरावती येथे होणाऱ्या सीनियर राज्यस्तरीय स्पर्धेत तसेच वर्धा येथे होणाऱ्या सबज्युनियर, ज्युनियर स्पर्धेत सहभागी होण्याची संधी मिळणार आहे.