शैक्षणिक प्रगती : भंडारा जिल्ह्यातील अधिकारी, कर्मचाऱ्यांची उपस्थितीभंडारा : प्रगत शैक्षणिक महाराष्ट्र कार्यक्रमांतर्गत नागपूर येथे दोन दिवसीय नागपूर विभागीय पर्यवेक्षिय अधिकारी व शिक्षकाच्या शिक्षण परिषदेचे आयोजन करण्यात आले होते.प्रगत नावाच्या विचाराने झपाटलेल्या १ हजार क्षेत्रीय अधिकारी कर्मचाऱ्याची २० लाख विद्यार्थी प्रगत करण्याचे स्वप्न घेऊन निघालेली ही परिषद म्हणजे एक संवाद यात्राच होती. या परिषदेत नागपूर विभागातील भंडारा, चंद्रपूर, गडचिरोली, गोंदिया, वर्धा व नागपूर या जिल्ह्यातील क्रियाशील शिक्षक, साधनव्यक्ती, केद्र प्रमुख, विस्तार अधिकारी, गटशिक्षणाधिकारी, शिक्षणाधिकारी, डाएटचे प्राचार्य सहभागी झाले होते.आपली शाळा प्रयत्नाने प्रगत करणाऱ्या विभागातील सहा जिल्ह्यातील सहा प्रगत शिक्षकांनी आपले विद्यार्थी कसे प्रगत होत गेले. सुलभ म्हणून आपण आपली भूमिका कशी पार पाडली हे तंत्र फलकावर प्रर्दशीत केले. केंद्र प्रमुख, शिक्षण विस्तार अधिकारी, साधनव्यक्ती, गटशिक्षण अधिकारी, शिक्षणाधिकारी, प्राचार्य डायट यांनी आपापले कार्यक्षेत्र प्रगत करणाऱ्या अधिकाऱ्यांनी आपल्या कामाची दिशा समजावून सांगितली. आपण यशस्वी कसे होत आहोत, काय अडथळे आले, आपण त्यावर कशी मात केली आणि कसे विजयी झालो याचे वर्णन केले. या सादरीकरणात भंडारा जिल्ह्यातील नरेश नवखरे; साधन व्यक्ती, सविता उप्रिकर; केंद्र प्रमुख विरली तालुका लाखांदूर, सुकराम पडोळे; विस्तार अधिकारी, सानगडी, कैलास चव्हाण; शिक्षक, चिखला मराठी शाळा तुमसर आदींनी सादरीकरण केले. सर्वांच्या सादरीकरणाला उपस्थितांनी दाद दिली. प्रगत शैक्षणिक महाराष्ट्रचे काम फार सकारात्मकरित्या सुरू आहे व कितीतरी नवे बदल शिक्षण प्रक्रियेत घडत आहेत, हे चित्र या सादरीकरणातून स्पष्ट झाले.जिल्ह्याच्या शैक्षणिक प्रगतीचा व कार्यक्रमाची दिशा शिक्षणाधिकारी सुवर्णलता घोडेस्वार यांनी कथन केली. शाळाबाह्य बालक मुक्त तालुका कसा कराल याचे स्वानुभव कथन डायटचे प्राचार्य अभय परिहार भंडारा यांनी केले. उपस्थित अधिकाऱ्यांना हे शक्य आहे, असा विश्वास प्राप्त करून दिला. साधनव्यक्ती चांगदेव सोरते आणि नरेश नवखरे याची अंतकरणातून काम करण्याची तळमळ सर्वांना प्रेरित करणारी आहे. शिक्षण आयुक्त धीरजकुमार यांनी विदर्भ प्रगत व्हावा यासाठीचे सशक्त प्रेरक विचार आणि त्यांची उपस्थिती सर्वांना निश्चयाचे बळ देत देणारी होती. तर विभागीय शिक्षण उपसंचालक अनिल पारधी यांचे नेटके आयोजन परिषद यशस्वी होण्याचे आणखी काही कारण होते. शिक्षण संचालक गोविंद नांदेडे समारोपात शुभेच्छा देत शिक्षण प्रक्रिया ही दु:खाची जत्रा न होता ती आनंद यात्रा व्हावी असे मत व्यक्त केले. कार्यक्रमाला गोविंद नांदेडे, धीरजकुमार, नागपूरच्या मुख्य कार्यकारी अधिकारी डॉ. कादंबरी बलकवडे, राज्य समन्वयक शाम मक्रमपूरे आदी उपस्थित होते. या विभागीय परिषदेचे संचालन स्मिता गालफाडे व मुकुंद ठवकर यांनी केले. (नगर प्रतिनिधी)
विभागीय प्रेरणा शिक्षण परिषद
By admin | Updated: September 19, 2016 00:43 IST