चिखली बिटात सागवान झाडांची सर्रास कत्तल

तालुक्यातील लेंडेझरी वनपरिक्षेत्रांतर्गत चिखली बिटात मौल्यवान सागवान वृक्षांची कत्तल करण्यात आली. वनविभागाने थुटासह माल जप्त केला. जप्ती झाडांची किंमत केवळ ७० ते ८० हजार असल्याचे वनविभाग सांगत आहे.

तुमसर : तालुक्यातील लेंडेझरी वनपरिक्षेत्रांतर्गत चिखली बिटात मौल्यवान सागवान वृक्षांची कत्तल करण्यात आली. वनविभागाने थुटासह माल जप्त केला. जप्ती झाडांची किंमत केवळ ७० ते ८० हजार असल्याचे वनविभाग सांगत आहे. सन १९६० पासून जंगलात एक हजार हेक्टर परिसरात मौल्यवान सागवान वृक्ष आहेत. या वृक्षांच्या सुरक्षितेवर प्रश्नचिन्ह उपस्थित होत आहे.भंडारा जिल्ह्यात सर्वात घनदाट जंगल म्हणून लेंडेझरी तथा नाकाडोंगरी वनपरिक्षेत्राचा समावेश होतो. तुमसर ३५ कि.मी. अंतरावर लेंडेझरी वनपरिक्षेत्र आहे. या वनपरिक्षेत्राच्या चिखली बिटात २४ व २५ मे रोजी वनविभागाच्या कर्मचाऱ्यांनी एका कंत्राटदाराच्या ठिय्यावरून सागवान वृक्ष जप्त केले. हे सागवान वृक्ष आदिवासींच्या शेतातून कापले असे जप्तीमध्ये नमूद केले आहे. थुटासहित हे सागवान वृक्ष चौकशीत आढळले. वनविभागाच्या नियमानुसार टीआर, खसरा क्रमांक, केस सेलींग आॅर्डर तयार करून माल जप्त करण्यात आला. त्या सागवान वृक्षांची किंमत ७० ते ८० हजार असल्याचे सांगण्यात येते.चिखली गावाशेजारी दोन कंत्राटदारांचे टॉल्स आहेत. या कंत्राटदारांकडे नियमानुसार लायसेन्स आहेत. नियमानुसार अधिकृत इतर वृक्षासहित त्यांचेकडे सागवान वृक्ष सुद्धा आहेत. पुष्पतोडे या कंत्राटदारावर वनविभागाने नियमानुसार कारवाई केली असे सांगण्यात आले. या प्रकरणात तक्रारीनंतर वनविभाग खडबडून जागे झाले. प्रकरण अंगलट येणार असे दिसताच नवनविभागाने कारवाई केल्याची माहिती आहे. सध्या सागवान जप्त करून वनविभागाने डेपोत पाठविले आहे. नागपूर जिल्ह्याच्या सीमा जवळ आहेत. एक चमू नागपूरवरून येथे आली होती. त्यानंतर कारवाईला गती आली अशी माहिती आहे. चमू कोणाची होती याबाबत गुप्तता पाळली जात असली तरी दबक्या आवाजात परिसरात चर्चा सुरु आहे. ती चमू परतल्यावर वनविभागाने कारवाई केली. चिखली बिटात कंपार्टमेंट क्रमांक ५९ व ६० मध्ये अनुक्रमे ५८१ व सुमारे ५०० हेक्टर मध्ये सागवानचे जंगल आहे. सन १९६० मध्ये सागवान रोपवन येथे तयार करण्यात आले होते. त्यानंतर सन १९७८, १९७९, १९९५ व १९९६ मध्ये येथे सागवन रोपवन तयार करण्यात आले. या रोपवनातील सागवानाची झाडे मोठी झाली असून त्यांची किंमत सध्या कोट्यवधींची आहे. या सागवन रोपवनातून आतापर्यंत वनविभागाने वृक्षतोड केली नाही हे विशेष. सुमारे एक हजार हेक्टर परिसरात पसरलेल्या सागवान वृक्षांच्या संरक्षणाकरिता केवळ दोन बिट कर्मचारी आहेत. त्यांचेकडे स्वत:च्या सुरक्षेकरिता शस्त्रे नाहीत. या घनदाट जंगलातील झाडे सुरक्षित असतील का? असा प्रश्न उपस्थित होतो. (तालुका प्रतिनिधी)