खापा परस्वडा रस्त्याची दुरावस्था

खापा राष्ट्रीय महामार्गापासून परसवाडा या गावचे अंतर तीन किलोमीटर आहे. हा रस्ता खड्डेमय झाला असून पावसाळ्यात या खड्ड्यात मोठ्या प्रमाणात पाणी साचले आहे. परसवाडा येथील नागरिक खापा, तुमसर येथे याच रस्त्याने मार्गक्रमण करतात. या रस्त्यावर अनेकांचे अपघात झाले आहेत. दुचाकी, चारचाकी वाहने, बैलबंडी या रस्त्याने ये-जा करतात. रस्त्याची अक्षरशः चाळण झाली असून ठिकठिकाणी रस्त्यावर खड्डे पडले असतानाही बांधकाम विभागाचे दुर्लक्ष होत आहे. बांधकाम अभियंत्यांना निवेदन देऊनही याकडे दुर्लक्ष होत आहे. सार्वजनिक बांधकाम विभागाचे उपविभागीय अभियंता विनोद चुरे यांना युवा सेनेचे जिल्हा समन्वयक मनोज चौबे, तालुकाध्यक्ष पवन खवास यांनी दुरुस्तीसाठी निवेदन दिले. अन्यथा रस्त्याची दुरुस्ती न केल्यास आंदोलनाचा इशारा निवेदनातून देण्यात आला आहे.