१० वर्षांत ४४ खून

तुमसर पोलीस ठाण्यांतर्गत मागील १० वर्षांमध्ये ४४ खून झाले. सर्वाधिक ११ खून सन २०११ मध्ये झाले होते.

तुमसर पोलीस ठाण्यांतर्गत प्रकार : सुपारी किलरचा वाढतोय ट्रेंडतुमसर : तुमसर पोलीस ठाण्यांतर्गत मागील १० वर्षांमध्ये ४४ खून झाले. सर्वाधिक ११ खून सन २०११ मध्ये झाले होते. यातील दरोडा प्रकरणातील तिहेरी हत्याकांड राज्यात गाजले होते. सन २००९ ते २०१३ पर्यंत २२ खून झाल्याची नोंद आहे. ‘सुपारी किलर’कडून खून करण्याची पद्धत शहरात डोके वर काढू पाहत आहे.तुमसर शहराची तांदूळ तथा कुबेरनगरी अशी ओळख आहे. राज्य महामार्ग, आंतरराज्यीय महामार्ग तथा मुंबई-हावडा या प्रमुख रेल्वे मार्गावरील राज्याच्या शेवटच्या टोकावर तुमसर वसलेले आहे. येथील प्रमुख व्यापार तांदूळ, मॅग्नीज खाणीसह सराफा व्यवसाय येथे मोठ्या प्रमाणात आहे. औद्योगिक कारखाने बंद अवस्थेत आहे. नागपूर तथा गोंदिया या दोन प्रमुख शहराशी येथील नागरिकांचे ये-जा आहे.मागील १० वर्षात शहर अशांत झाल्याचे दिसून येते. सन २००५ ते २०१५ दरम्यान एकूण ४४ खुनांची नोंद येथे झाली आहे. कोणताही सुज्ञ माणूस तथा पोलीस प्रशासनाची नक्कीच झोप उडविणारा आकडा आहे, परंतु पोलीस विभागाने ही बाब गांभीर्याने घेतल्याचे दिसून येत नाही.तुमसर ठाण्यांतर्गत सन २००५ मध्ये ७ खून, २००६ मध्ये ५, २००७ मध्ये ४, २००८ मध्ये ३, २००९ मध्ये ३, २०१० मध्ये ४, २०११ मध्ये ११, २०१२ मध्ये १, २०१३ मध्ये ३, २०१४ मध्ये २, सन २०१५ मध्ये १ असे एकूण ४४ अशी आकडेवारी आहे. यात काही खुनात सुपारी किलरची मदत घेण्यात आली होती. सोनी परिवारातील तिघांच्या हत्येचे प्रकरण राज्यात गाजले होते. यातील काही आरोपी नागपूर येथील होते. यातील काही खून पूर्व वैमनस्यातून घडले हे येथे उल्लेखनीय.तुमसर हे शांत शहर म्हणून ओळखले जाते. मागील काही वर्षांपासून शहरात टोळ्या तयार झाल्या आहेत. या टोळींचा भडका येथे उडतांनी दिसतो. शहराची लोकसंख्या ४२ हजार आहे. शहर जुने असून तितकीच त्याची ऐतिहासिक पार्श्वभूमी आहे.तुमसर शहरात मागील ८ ते ९ वर्षापासून उपविभागीय पोलीस अधिकाऱ्यांचे कार्यालय आहे. या कार्यालयांतर्गत आंधळगाव, मोहाडी, तुमसर, सिहोरा व गोबरवाही ही पोलीस ठाणी येतात, परंतु या कार्यालयामुळे विशेष असा फरक पडलेला दिसून येत नाही. पोलीस विभागाच्या वरिष्ठ अधिकाऱ्यांनी याकडे विशेष लक्ष देण्याची गरज आहे.मागील १० वर्षात खूनाची आकडेवारी उपविभागीय पोलीस अधिकारी प्रकाश बुरडे यांना मागीतल्यावर त्यांनी अशी अधिकृत आकडेवारी देता येत नाही. याकरिता माहितीचा अधिकार अंतर्गत रितसर अर्ज करा असे सांगून मी नव्याने तुमसर येथे रूजु झालो आहे अशी पुस्ती जोडली. दि. १२ आॅगस्टला सकाळी ६.३० दरम्यान राष्ट्रवादीच्या नगरसेवकावर पिस्तुल तथा शस्त्रनिशी प्राणघातक हल्ला झाला. येथे सुपारी किलरचे नाव पुढे आले. आता लहान शहरातील हा ट्रेंड सुरु झाल्याचे दिसते. येथील काहींची मुंबईतील अंडरवर्ल्डसारखी टोपण नावे आहेत, हे विशेष. (तालुका प्रतिनिधी)