सहा विधानसभेतील निवडणूक : प्रवाशांची गैरसोय टाळण्याचा रापमचा प्रयत्नभंडारा : १५ आॅक्टोंबरला होऊ घातलेल्या विधानसभेच्या निवडणुकीसाठी भंडारा एसटी विभागाच्या २३६ बसेस बुक करण्यात आल्या आहे. १४ व १५ आॅक्टोंबरला या बसेस पोलींग पाट्री पोहचविण्यासाठी निवडणूक विभागाने आरक्षित केल्या आहेत. दोन दिवस बसेस बुक असल्याने प्रवाशांची गैरसोय टाळण्यासाठी रापमचा प्रयत्न आहे.विधानसभेची पंचवार्षिक निवडणूक १५ आॅक्टोंबरला राज्यात एकाच दिवशी घेण्यात येत आहे. निवडणूक आयोगाने पोलींग पाट्रीला मतदान केंद्रापर्यंत पोहचविता याव्या, यासाठी महाराष्ट्र राज्य मार्ग परिवहन महामंडळाच्या तथा खासगी गाड्यांची व्यवस्था केली आहे. भंडारा व गोंदिया जिल्ह्यातील सहा विधानसभा निवडणुकीसाठी भंडारा विभागातील २३६ बसेस आरक्षित केल्या आहेत.भंडारा जिल्ह्यातील भंडारा, साकोली व तुमसर तर गोंदिया जिल्ह्यातील गोंदिया, आमगाव व तिरोडा विधानसभेसाठी निवडणूक होत आहे. प्रत्येक विधानसभा क्षेत्रातील मतदान केंद्रावरील कर्मचाऱ्यांना ईव्हीएम मशीनसह पोहचविण्याची जबाबदारी असल्याने बसेस आरक्षित केल्या आहेत. या बसेस १४ व १५ आॅक्टोंबरला निवडणुकीच्या कामात राहणार आहे. भंडारा विधानसभेसाठी ४४ बसेसची मागणी करण्यात आली आहे. यासाठी भंडारा आगारातुन २७ व पवनी आगारातुन १७ बसेस पाठविण्यात येणार आहे. साकोली आगाराला ६६ बसेसची मागणी करण्यात आली आहे. यातील ३७ बसेस साकोली विधानसभेसाठी तर २९ बसेस मोरगाव अर्जंनीसाठी लागणार आहेत. आमगाव व गोंदिया विधानसभेसाठी ६३ बसेसची मागणी करण्यात आली असून या बसेस गोंदिया आगार पुरवठा करणार आहे. त्यातील ३० बसेस आमगाव विधानसभेसाठी तर ३३ गोंदियासाठी मागणी करण्यात आली आहे. तिरोडा आगार तिरोडा विधानसभेसाठी लागणाऱ्या ३० बसेसचा पुरवठा करणार आहे.तुमसर विधानसभेतील पोलींग पाट्री पोहचविण्यासाठी लागणाऱ्या ३३ बसेस तुमसर आगार पुरवठा करणार आहे. भंडारा विभागात ४०६ बसेस उपलब्ध आहेत. त्यातील ३७२ बसेस नियमीत रस्त्यावर धावत आहेत. तर उर्वरीत बसेसची आवश्यकता नसल्याने त्या उभ्या आहेत. निवडणुकीसाठी २३६ बसेसची मागणी करण्यात आल्याने दोन दिवस प्रवाशांची तारांबळ उडू नये, यासाठी रापम उभ्या व सध्या कामात नसलेल्या बसेसच्या माध्यमातुन प्रवासी वाहतुक करणार आहे. (शहर प्रतिनिधी)
निवडणुकीसाठी २३६ बसेस 'बुक'
By admin | Updated: October 12, 2014 23:30 IST