लोकमत न्यूज नेटवर्क
शिरूर कासार : उमेद अभियानांतर्गत तालुक्यात गावोगावी महिला बचतगटांच्या माध्यमातून उपजीविका पोषण बाग विकसन व महासमृध्दी उपजीविका अभियान उपक्रम राबविण्यात येत आहे. या माध्यमातून बचत गटाच्या महिलांना घर प्रपंचाबरोबर अर्थिक हातभार देखील लागणार आहे.
महाराष्ट्र राज्य ग्रामीण जीवनोन्नती अभियानांतर्गत तालुक्यात उमेद तालुका अभियान व्यवस्थापन कक्ष अंतर्गत गाव पातळीवर माझी पोषणबाग विकसन मोहीम व महासमृद्धी उपजीविका अभियान राबविण्यात येत आहे. या मोहिमेअंतर्गत तालुक्यातील प्रत्येक गावी महिला बचत गट यांच्यामार्फत दहा सेंद्रिय पोषण बागा तयार केल्या जात आहेत. त्यामधून मिळणाऱ्या वेगवेगळ्या भाज्या ह्या त्यांना घरच्या घरी ताज्या मिळणार आहेत. परिणामी गर्भवती महिला, स्तनदा मातांसह लहान व किशोरवयीन मुले-मुलींना आहारातून विविध पोषणमूल्ये मिळावीत यासाठी राज्य स्तरावरून अभियान राबविण्यात येत आहे. यामध्ये बचत गटाच्या महिलांनी पुढाकार घेऊन पोषणबागा प्रत्येक गावात तयार केल्या जात आहेत. महासमृद्धी उपजीविका अभियानांतर्गत बीजप्रक्रिया, बीज उगवण क्षमता प्रात्यक्षिक, पोषणबाग आखणी व लसीकरण व एकत्रित खत बी-बियाणे खरेदी, बीज उगवण क्षमता उपक्रम गाव पातळीवर राबविण्यात येत आहेत. शनिवारी वारणी येथे उमेद तालुका अभियान व्यवस्थापन कक्ष व कृषी विभागातर्फे बीज प्रक्रिया, उगवण क्षमतेचे प्रात्यक्षिक घेऊन तूर बियाणे वाटप करण्यात आले. या कार्यक्रमास विठ्ठल ढाकणे, विजया दिवटे, अमोल गलांडे, मीरा गिरी व महिला शेतकरी मोठ्या संख्येने उपस्थित होत्या.
------
विषमुक्त भाजीपाला पिके घ्या
यावेळी तालुका व्यवस्थापक विठ्ठल ढाकणे यांनी सध्याचा काळात बियाणे खूप महाग झाले आहे. त्यामुळे बियाणांवर प्रक्रिया करूनच त्याची लागवड करण्याचे आवाहन केले. तर कृषी सहायक कविता ढाकणे म्हणाल्या, सेंद्रिय पोषण बागेतील ताजा भाजीपाला हा घरातील कुटुंबापुरता वापरून उर्वरित विक्री करून उपजीविका भागवावी. पेरणीला घाई न करता योग्य पाऊस झाला की पेरणी करावी. रासायनिक कीटकनाशके व खते न वापरता सेंद्रिय शेती करून विषमुक्त भाजीपाला व पिके घ्यावीत, असे मार्गदर्शन त्यांनी केले. अश्विनी इंगळे यांनी पोषणबाग तयार करण्याचे तंत्र समजावून सांगितले.
===Photopath===
190621\023222221814-img-20210619-wa0014.jpg~190621\023222221814-img-20210619-wa0014.jpg
===Caption===
महिला बचत गटांना पोषन बागेची माहिती देताना कविता ढाकणे~महिला बचत गटांना पोषन बागेची माहिती देताना कविता ढाकणे