सोमनाथ खताळ ।
लोकमत न्यूज नेटवर्कबीड : ‘ए मेरे वतन के लोगों,तुम खुब लगा लो नारा,यह शुभ दिन हैं सब कालहरा लो तिरंगा प्यारा’हे गीत कानावर जरी पडले तरी अंगावर शहारे उभे राहतात. प्रत्येकाच्या मनात देशभक्ती जागी होते. असाच अनुभव रविवारी जिल्हा रुग्णालयात बीडकरांना आला. अपघातातून बचावलेल्या एका जवानाची विचारपूस करताना त्याने दिलेले उत्तरच तसे होते. तो म्हणतो, ‘भाई, हम जवान हैं, देश के लिए जिएंगे और मरेंगे.’ हे वाक्य ऐक णाºयांच्या अंगावर शहारे उमटले.
परळी येथील मुरलीधर शिंदे या जवानाचा अल्पशा आजाराने चंदीगढ येथे मृत्यू झाला. रविवारी परळी येथे त्याच्या पार्थिवावर अंत्यसंस्कार होणार होते. त्यांना मानवंदना देण्यासाठी अहमदनगर येथील भारतीय लष्करी प्रशिक्षण केंद्रातील जवानांची तुकडी परळीकडे जात होती. परंतु त्यांच्या गाडीचा तेलगावजवळ अपघात झाला. यामध्ये तब्बल १५ जण बालंबाल बचावले. ‘काळ आला होता, पण वेळ आली नव्हती’ अशीच काहीसी प्रचिती या अपघाताने पहावयास मिळाली.
दरम्यान, २४ तास देश संरक्षणासाठी सीमेवर लढणा-या जवानांप्रती प्रत्येक भारतीयाला आदर, सन्मान व अभिमान आहे. या अपघाताची माहिती मिळताच परिसरातील शेकडो लोक मदतीसाठी धावले. कोणी पाणी दिले, कोणी आधार दिला, कोणी जखमेवरील रक्त स्वत:च्या कपड्याने पुसले. हे पाहून जवानांनाही धीर मिळाला. एवढा मोठा अपघात होऊनही ते खचले नाहीत. त्यांना जिल्हा रुग्णालयात सुखरुप दाखल केले. येथे त्यांच्यावर तात्काळ उपचारही करण्यात आले. जिल्हा आरोग्य प्रशासन व बीड जिल्हा पोलीस दल मदतीसाठी धावपळ करताना दिसून आले. हे सर्व पाहून बीडकरांमध्ये माणुसकी अजूनही शिल्लक आहे, याचा अनुभव आला.
एसपींना म्हणाले, ‘जय हिंद’ सरअपघातांत गंभीर जखमी होऊनही वरिष्ठांबद्दलचा आदर, सन्मान या जवानांच्या प्रत्येक हालचाल व बोलण्यातून दिसत होता. माहिती मिळताच आ. विनायक मेटे, पोलीस अधीक्षक जी. श्रीधर, उपअधीक्षक सुधीर खिरडकर यांनी रुग्णालयात धाव घेऊन जखमी जवानांची विचारपूस करीत त्यांना मदत केली. अधीक्षकांची जवानांना ओळख होताच ‘जय हिंद सर’, असा आवाज त्यांच्या तोंडून निघाला. यातून खूप काही पहावयास, शिकण्यास आणि अनुकरण करण्यासारखे दिसून आले.उपअधीक्षकांनी वरिष्ठांना कळविलेपअधीक्षक खिरडकर यांनी जखमी जवानांची विचारपूस केली. एका जवानाने ‘हमारे आॅफिसर्ससे बात करवा लो’, असे म्हटले. यावेळी खिरडकर यांनी तात्काळ नगरच्या अधिकाºयांशी संपर्क साधून अपघाताची माहिती दिली. तसेच बीडमध्ये जवानांना पूर्ण सहकार्य केले जाईल, आम्ही सोबत आहोत, असे म्हणत त्यांना धीर दिला.मदतीसाठी सरसावले हातरुग्णालयाच्या प्रवेशद्वारातून जवानांचे वाहन येताच परिसरातील विविध क्षेत्रातील नागरिक मदतीसाठी धावले. कोणी स्ट्रेचर आणले, तर कोणी वाहनांतून उतरवून आपल्या खांद्यावर घेत स्ट्रेचरपर्यंत पोहचवत होते तर, कोणी खांद्यावर हात देऊन त्यांच्या चालण्याची काठी बनले. जिल्हा रुग्णालयातील डॉक्टर, परिचारिका व शिकाऊ विद्यार्थिनींनी औषधोपचारासाठी तत्परता दाखवली. एका खाजगी रूग्णालयातील डॉक्टरनेही मोफत उपचार केले. रात्री उशिरा आ. विनायक मेटे यांनी जवानांची भेट घेतली.