नृसिंह सुर्यवंशी
बीड - जिल्ह्यातील लाडझरी ता. परळी वै. येथील शहीद सैनिक महेश यशवंत तिडके (वय २३) यांच्यावर अतिशय शोकाकुल वातावरणात शासकीय इतमामात सकाळी ९-३० वाजता अंत्यसंस्कार करण्यात आले. महेश तिडके हे भटींडा पंजाब येथे सैन्यात टेक्नीशीयन या पदावर कार्यरत होते. ड्युटी संपवून कॉर्टरला घरी मोटारसायकलवरून परतत असताना १९ डिसेंबर रोजी दाट धुक्यात कारने धडक दिली. या अपघातात गंभीर जखमी झाल्याने त्यांना सैन्याच्या दवाखान्यात दाखल करण्यात आले. मात्र, २७ डिसेंबर रोजी ते कोमात गेले व अखेर 30 डिसेंबर रोजी त्यांची प्राणज्योत मालवली.
महेश हे २०१६ मध्ये सैन्यात भरती झाले होते. अंत्यसंस्कारापूर्वी शहीद महेश यांचे पार्थिव अंत्यदर्शनासाठी जि.प. शाळेच्या प्रांगणात ठेवण्यात आले होते. त्याठिकाणी अलोट गर्दी उसळली होती.
सैन्याचे बाळकडु घरातूनच
शहीद महेश तिडके यांचे वडील सैन्यात होते, ते सेवानिवृत्त झाले आहेत. तर त्यांचे मोठे बंधू राहुल यशवंत तिडके हेही सैन्यात असून ते श्रीनगर येथे कार्यरत आहेत. घरातील सैनिकांची पार्श्वभूमी पाहता महेश यांनी आर्मीत भरती होण्यासाठी कठोर मेहनत घेतली होती. दहावीनंतर पॉलीटेक्नीक करून ते सैन्यात भरती झाले होते. महेश यांच्या निधनाचे वृत्त समजताच राज्याचे मंत्री ना धनंजय मुंडे यांनी शोकसंदेश पाठवून आपल्या संवेदना प्रकट केल्या. शासनाच्या वतीने उपजिल्हाधिकारी गणेश महाडीक, परळीचे तहसिलदार पाटील, गटविकास अधिकारी संजय केंद्रे, तलाठी रेश्मा गुणाले, ग्रामसेवक ज्ञानेश्वर मुकाडे, यांनी पुष्पचक्र अर्पण करून श्रद्धांजली अर्पण केली. माजी मंत्री पंडीतराव दौंड, परळी प स सभापती बबनराव गित्ते, शिवाजी गुट्टे यांनी अंत्यदर्शन घेवून संवेदना व्यक्त केल्या.
शहीद महेश तिडके यांचे आठ महिन्यांपूर्वी लग्न झाले होते. त्यांची सासुरवाडी मैंदवाडी ता. परळी वै असून त्यांच्या पश्चात पत्नी, आई वडील भाऊ असा परिवार आहे. या घटनेनं लाडझरी, मैंदवाडी या दोन्ही गावावर शोककळा पसरली आहे. अंत्यसंस्कारापूर्वी अहमदनगर येथून आलेल्या सैनिकांनी हवेत फैरी झाडून मानवंदना दिली. अतिशय भावविभोर वातावरणात अमर रहे च्या घोषणात शहीद महेश यांना अखेरचा निरोप देण्यात आला.