केज : पुतण्यासोबत दुचाकीवर जाणाऱ्या एका 35 वर्षीय महिलेस तालुक्यातील साळेगावजवळ केज रोडवर दुपारी 12.30 वाजता अडवून निर्घृण हत्या करण्यात आली. हल्ल्यात दुचाकीचालक गंभीर जखमी असून त्याच्यावर उपचार सुरू आहेत. लोचना माणिक धायगुडे (35) असे मृत महिलेचे नाव आहे. तर अंकुश दिलीप धायगुडे असे जखमी तरुणाचे नाव आहे.
अंबाजोगाई तालुक्यातील धायगुडा पिंपळा येथील लोचना माणिक धायगुडे (35) व तिचा पुतण्या अंकुश दिलीप धायगुडे हे दुचाकीवरुन केजकडे जात होते. यावेळी साळेगावजवळ अज्ञातांनी रस्त्यामध्ये अडवून त्यांच्यावर तीक्ष्ण हत्याराने वार केले. यात लोचना धायगुडे यांचा जागीच मृत्यू झाला. तर त्यांचा पुतण्या अंकुश दिलीप धायगुडे हा गंभीर जखमी झाला. त्यानंतर हल्लेखोर अंकुशची दुचाकी घेऊन फरार झाले. माहिती मिळताच केज पोलिस घटनास्थळी दाखल झाले. जखमी अंकुश यावर उपचार सुरू आहेत. पोलीस पुढील तपास करत आहेत. दरम्यान, महिलेच्या खुनाची केज तालुक्यातील आठवडाभरातील ही दुसरी घटना आहे.