लोकमत न्यूज नेटवर्क
बीड : जिल्ह्यात कोरोनाकाळात मेडिकल चालकांकडे औषध प्रशासनाचे दुर्लक्ष झाले होते. तर नागरिकांनीही कोरोना चाचणीच्या भीतीने आजार सांगून मेडिकलमधून औषधी नेली. याबाबतच्या प्राप्त तक्रारी आणि तपासणीत काही लोक दोषी आढळले. मागील वर्षभरात अशा ५ मेडिकलचे परवाने कायमचे रद्द केले तर २० मेडिकलचे तात्पुरते निलंबित करण्यात आले आहे.
जिल्ह्यात जवळपास दीड हजार मेडिकल परवाने आहेत. अनेक मेडिकलवर औषध निर्माता नसतात. तर काही ठिकाणी ठरवून दिलेल्या नियमांचे पालन होत नाही. डॉक्टरांच्या चिठ्ठीशिवाय औषधी देऊ नये, असा नियम आहे. परंतु मेडिकल चालकांकडून याचे उल्लंघन होत आहे. आतापर्यंत अशा २५ जणांवर कारवाया झाल्या आहेत.
कोरोकाळात सर्दी-अंगदुखीसाठी डॉक्टरकडे कोण जाणार?
n कोरोनाकाळात अनेकांना सर्दी, ताप, खोकला अशी लक्षणे जाणवत होती.
n परंतु डॉक्टरकडे गेल्यावर लगेच कोरोना चाचणी करण्याचा सल्ला दिला जात होता.
n त्यामुळे काही लोकांनी डॉक्टरांकडे जाणेच टाळल्याची अनेक उदाहरणे पहायला मिळाली.
n म्हणून चिठ्ठीशिवाय औषधे घेतली.
बहुतांश ठिकाणी मिळतात चिठ्ठीशिवाय औषधी
बार्शी रोड, बीड
शहरातील बार्शी रोडवर जिल्हा रुग्णालय आहे. याच रुग्णालयाबाहेर मेडिकल थाटलेली आहेत. या ठिकाणी सर्रासपणे चिठ्ठीशिवाय औषधी दिल्याचे दिसतात. चालकांकडून नागरिकांना आजार विचारून घेत औषधी दिली जातात. याची तपासणी करण्यास औषध प्रशासनाकडे वेळच नाही.
बसस्थानकामागे, बीड
बीड बसस्थानकाच्या मागे डॉक्टरलाईन आहे. येथे सर्वत्र खासगी रुग्णालये व मेडिकल आहेत. तसेच सुभाष रोड, जालना रोड, नगर रोड भागातही रुग्णालयाविना स्वतंत्र असे मेडिकल आहेत. येथे सर्रासपणे आजार विचारून औषधी दिली जात असल्याचे विश्वसनीय सूत्रांकडून सांगण्यात आले.
औषधी प्रशासन म्हणते....
कोरोनाकाळात चिठ्ठीशिवाय औषधी दिल्याच्या तक्रारी प्राप्त झाल्या होत्या. याची तपासणी आमच्याकडून करण्यात आली. ज्या ठिकाणी थोड्या त्रुटी दिसल्या तेथील परवाने निलंबित करण्यात आले. तर जेथे जास्त होत्या, त्यांचा परवाना कायमचा रद्द करण्यात आला.
रामेश्वर डोईफोडे,- औषध निरीक्षक, बीड
---
वर्षभरात झालेल्या कारवाया
कायमचा परवाना रद्द- ५
परवाने निलंबित- २०