परळी : एक युवक सातत्याने मोबाईलवर फोन करून त्रास देत असल्याने शहरातील जगतकर गल्ली (भिमनगर ) येथील 24 वर्षीय मुलीने घरात गळफास घेऊन आत्महत्या केल्याची घटना येथे 12 जून रोजी घडली. याप्रकरणी मुलीच्या वडिलांनी शहर पोलीस ठाण्यात 24 जून रोजी तक्रार दाखल केली आहे. त्यावरून इस्लामपूरबंगला भागातील उस्मान लतीफ शेख (24) या युवकाविरोधात गुन्हा दाखल करण्यात आला आहे. आरोपी फरार असून गुरुवारी दुपारपर्यंत त्याला अटक झालेली नव्हती.
याबाबत पोलिस सूत्रांकडून मिळालेली माहिती अशी की, जगतकर गल्लीतील एक 24 वर्षीय मुलगी येथील नर्सिंग कॉलेजमध्ये शिक्षण घेत होती. भीमनगरपासून जवळच असलेल्या इस्लामपूरा बंगला येथे राहणाऱ्या व वेल्डिंगचे काम करणारा लतीफ शेख उस्मान हा सातत्याने मोबाईलवर फोन करून त्रास देत होता. १२ जूनला आई-वडील एका लग्नाला गेले असता मुलीने घरात गळफास घेऊन आत्महत्या केली. आई-वडील घरी येताच घराचा दरवाजा लावलेला दिसला. दरवाजाची कडी काढून आत प्रवेश केला असता मुलीने आत्महत्या केल्याचे दिसून आले.
याप्रकरणी परळी शहर पोलीस ठाण्यात 24 जून रोजी मुलीचे वडील सखाराम जगतकर यांनी तक्रार दाखल केली. त्यावरून पोलिसांनी उस्मान लतीफ शेख विरोधात आत्महत्येस प्रवृत्त केल्याचा व ॲट्रॉसिटी कायदयानुसार गुन्हा दाखल करण्यात आला आहे. आरोपी फरार असून पोलीस त्याचा शोध घेत आहेत. या प्रकरणाचा तपास उपविभागीय पोलिस अधिकारी राहुल धस हे करीत आहेत. आरोपीने मुलीस मोबाइलवर संपर्क केल्याचे पोलीस तपासात स्पष्ट झाले असल्याची माहिती पोलीस सूत्रांनी दिली आहे.