गेवराई (जि.बीड) : घराजवळ कोण आहे, हे पाहताना एका १५ वर्षीय मुलीचे अपहरण करून तिच्यावर सामूहिक अत्याचार केल्याचा प्रकार समोर आला. दरम्यान, हा प्रकार पाहणाऱ्या सदर मुलीच्या १३ वर्षीय बहिणीवर तलवारीने प्राणघातक हल्ला केल्याची घटना २० जून रोजी तालुक्यातील नागझरी येथे रात्री बारा वाजण्याच्या सुमारास घडली. याप्रकरणी पीडित मुलीच्या फिर्यादीवरुन २५ जून रोजी गेवराई पोलीस ठाण्यात पाच जणांविरुद्ध गुन्हा दाखल करण्यात आला आहे.
तालुक्यातील एका गावात १५ वर्षीय मुलगी आपल्या बहिणीसोबत घरात होती. त्याचवेळी २० जून रोजी रात्री १२ च्या सुमारास आपल्या घरासमोर कोणीतरी उभे आहे, हे पाहत असताना आरोपींनी तिचे तोंड दाबून घरामागे नेले. बहिणीचा आवाज ऐकू आल्याने तिची १३ वर्षीय बहीण त्या ठिकाणी गेली असता, आरोपींनी तिच्यावर तलवारीने वार केले. ती गंभीर जखमी झाली असून जिल्हा रूग्णालयात उपचार सुरू आहेत. ही घटना घडल्यानंतर ५ दिवसांनी गेवराई ठाण्यात २५ जून रोजी मुलीच्या फिर्यादीवरुन नारायण भारत पवार, पप्पु भारत पवार , देवगण विश्वास चव्हाण, शहादेव विश्वास चव्हाण व जावेद विश्वास चव्हाण यांच्याविरूद्ध गुन्हा दाखल झाला आहे.
पीडित मुलीची वैद्यकीय तपासणी : या प्रकरणी पीडितेला मेडिकलला पाठवले असून, या गुन्ह्याचा तपास योग्यरीतीने लावून गुन्ह्यातील आरोपीला अटक करण्यात येईल, असे तपास अधिकारी पोलीस उपनिरीक्षक अश्विनी कुंभारे यांनी सांगितले. बुधवारी बीड येथील जिल्हा रुग्णालयात पीडित मुलीची वैद्यकीय तपासणी करण्यात आली.