बीड : शहरातील नगर रोडवरील एलआयसी ऑफिसला सोमवारी पहाटे भीषण आग लागली. या आगीत पूर्ण ऑफिस जाळून खाक झाले असून, प्रचंड नुकसान झाले आहे. परिसरातील नागरिकांनी आगीची माहिती दिल्यानंतर अग्निशमन दलाच्या जवांनी धाव घेत आग आटोक्यात आणण्याचा प्रयत्न केला, काही तासानंतर आग आटोक्यात आली. परंतु धुराचे लोट सकळी 8 वाजेपर्यंत निघत होते.
बीड शहरातील एलआयसी ऑफिसला आज पहाटे भीषण आग लागली. पहाटेची वेळ असल्याने आग पूर्ण ऑफिसमध्ये पसरली. आग एवढी भीषण होती की ऑफीसमधील साहित्याच्या अक्षरशः कोळसा झाल्याचे दिसून येत आहे. सुदैवाने या आगीत जीवितहानी झाली नाही. मात्र ऑफिसचे प्रचंड नुकसान झाले आहे.
आग नेमकी कशामुळे लागली याचे कारण मात्र समजू शकले नाही. दरम्यान 'फायर सेफ्टी'ची कोणतीही व्यवस्था एलआयसी कार्यालयात नव्हती, त्यामुळे ही आग भडकली आणि नुकसान झाले आहे. सर्व दस्तऐवज ऑनलाइन असल्यामुळे ते सुरक्षित असल्याचे सांगण्यात येत आहे. मात्र या आगीची सखोल चौकशी करून दोषींवर कारवाई करण्याची मागणी होत आहे.