गावकरीच चालवतात लोकसहभागातून कोविड सेंटर

अनिल गायकवाड

कुसळंब : काेरोनाच्या संकट काळात आदर्श मॉडेल ठरलेल्या कुसळंब येथे शासनाचा आरोग्य विभाग, ग्रामपंचायत आणि मानवलोक स्वयंसेवी संस्थेच्या एकत्रित प्रयत्नातून मराठवाड्यातील पहिले लोकसहभागातील कोविड केअर सेंटर उभे राहिले. हे सेंटर परिसरातील काेरोना बाधितांसाठी वरदान ठरले असून आतापर्यंत ७ लाख रूपयांची देणगी या सेंटरसाठी मिळाली आहे. जिल्हा आरोग्य अधिकारी डॉ. आर. बी. पवार यांनी स्वतःच्या कुसळंब गावातील सरपंच व इतर पदाधिकारी, ग्रामस्थांशी चर्चा केली. कोविड केअर सेंटर सुरू करण्यासाठी गाव ही लगेच राजी झाले. श्री खंडेश्वर माध्यमिक शाळेत ५० बेडच्या सेंटरचा प्लान केला. मानवलोक स्वयंसेवी संस्थेने बेड, गाद्या, पंखे, ट्यूब, टॉयलेट्स, प्रोटोकॉलचे प्रिंटिंग, सावलीसाठी मंडप आदी भौतिक सुविधा पुरविल्या. ग्रामपंचायतीने पाणी, वीज, स्वच्छतेची सेवा पुरविली. आरोग्य विभागाकडून लागणारी औषधे आणि मनुष्यबळ पुरविण्यात आले.

या सेंटरचे पूर्ण नियोजन ग्रामपंचायतीने केले असून गावातील लोकच कोविड केअर सेंटर चालवतात. कुसळंब व परिसरातील नागरिकांच्या आतापर्यंत १,५०० चाचण्या केल्या. त्यापैकी ३५० नागरिक पॉझिटिव्ह आलेले आहेत. तर ४०० रुग्ण कोरोनामुक्त होऊन घरी सुखरूप गेले आहेत. गावातच उपचार मिळू लागल्यामुळे ५० बेड कमी पडू लागले. त्यामुळे आणखी ५० बेड वाढवण्यात आले. सर्वात महत्त्वाचे म्हणजे कोविड सेंटर झाल्यानंतर या परिसरात एकही रुग्ण कोरोनाने मयत झाल्याची नोंद नाही.

आयसीएमआरच्या प्रोटोकॉलनुसार उत्तम वैद्यकीय सुविधा, पोषक आहार, इतर अत्यावश्यक सुविधा या केंद्रात पुरवल्या जातात. सकाळी रुग्णांसाठी योगाचे क्लास तर रात्री जन, कीर्तन, संगीत कार्यक्रमांचे आयोजनातून रुग्णांना मानसिक आधार व समाधान मिळत आहे. मराठवाड्यातील अशा पहिल्या कोविड केअर सेंटरला ग्रामपंचायतने पाच लाख रूपये तर २ लाख रुपयांची देणगी गावातील रहिवासी असलेले व नोकरीनिमित्त बाहेर गावी असलेल्या लोकांनी दिली आहे.

शासकीय यंत्रणेवरील ताण कमी झाला

कुसळंब ग्रामपंचायतीचे मॉडेल सक्सेस स्टोरी म्हणून बीड जिल्ह्यात नावारूपाला आलेले आहे. डेथ रेट कमी होण्यासाठी, शासकीय यंत्रणेवरचा ताण कमी करण्यासाठी, लोकांचे मानसिक आरोग्य निरोगी ठेवण्यासाठी अशा प्रकारचे कोविड केअर सेंटर निश्‍चितपणे उपयुक्त ठरतील.

-

डॉ. राधाकिसन पवार

जिल्हा आरोग्य अधिकारी बीड.

म्हणून कुसळंबची निवड

कुसळंब हे बीड जिल्ह्यातील पहिले स्मार्ट ग्राम असून ५० लाखांचे बक्षीस या गावाला मिळालेले आहे. गाडगेबाबा स्वच्छता स्पर्धेत प्रथम आलेले आहे. गेल्या पंचवीस वर्षात गावात निवडणुका झालेल्या नाहीत. कोणतेही काम यशस्वी करण्यासाठी लोकसहभाग महत्त्वाचा असतो आणि या गावात लोकसहभागाची खात्री होती, त्यामुळे डॉ. आर. बी. पवार यांनी कुसळंबची निवड केली.

फोटो : लोकसहभागातून चालविल्या जाणाऱ्या कुसळंब येथील केअर सेंटरमधून उपचारानंतर कोरोनामुक्त नागरिकांवर फुलांचा वर्षाव करून सुटी दिली जाते.

===Photopath===

020621\02bed_4_02062021_14.jpg