बीड : आंध्र प्रदेशहून गुजरातकडे बिस्कीट घेऊन जाणाऱ्या कंटेनरला चोरट्यांनी टेम्पो आडवा लावत दोन चालकांना मारहाण करून बिस्कीटचा कंटेनर पळवून नेला. ही घटना शनिवारी रात्री ११.३० वाजेच्या दरम्यान चौसाळा बायपासवर घडली. चालकांनी घटनेची माहिती नेकनूर पोलिसांना दिल्यानंतर पोलिसांनी सर्व पोलीस ठाण्यांत अलर्ट दिला. त्यानंतर लातूर येथील पोलिसांनी कंटेनरसह तीन चोरट्यांना अटक केली आहे. या कंटेनरमध्ये २५ ते ३० लाख रुपयांची बिस्कीटे असल्याचा अंदाज आहे.
अस्लम खान अली व शहेबाज खान (रा.मेवात, राज्य हरियाणा) हे आपल्या कंटेनर ( एमएच ४० डीजे ४५९६)मध्ये आंध्र प्रदेशातून गुजरातकडे एका नामांकित बिस्कीट कंपनीचा माल घेऊन जात होते. रात्री ११.३० वाजेच्या दरम्यान बीड तालुक्यातील चौसाळा बायपासवर काही चोरट्यांनी या कंटेनरला टेम्पो आडवा लावला. त्यामुळे चालकाने कंटेनर थांबवले. यावेळी त्याला मारहाण करण्यात आली. तो गंभीर जखमी झाल्यानंतर कंटेनर पळवून नेला. घटनेची माहिती चालकाने नेकनूर पोलिसांना व चौसाळा चौकीला दिल्यानंतर नेकनूर ठाण्याचे प्रमुख सहायक पोलीस निरीक्षक लक्ष्मण केंद्रे, दीपक खांडेकर, अमोल नवले, सुशांत सोनवणे, जायभाये, डोंगरे, पारधी यांनी घटनास्थळी धाव घेऊन पंचनामा केला. दरम्यान, कोणत्या दिशेने हा कंटेनर चोरटे घेऊन जातील याचा अंदाज आल्याने त्या ठिकाणच्या सर्व पोलीस ठाण्यास अलर्ट केले. दरम्यान, हा कंटेनर लातूर तालुक्यातील जातेगावला असल्याचे तेथील पोलिसांच्या निदर्शनास आल्यानंतर पोलिसांनी हा कंटेनर जप्त करून तीन चोरट्यांना ताब्यात घेतले. कंटेनरमध्ये बिस्कीटचे १४०० बॉक्स होते, ज्याची किंमत २५ ते ३० लाख रुपये असल्याचा अंदाज व्यक्त केला जात आहे. चोरट्यांना ताब्यात घेतल्यानंतर नेकनूर पोलीस लातूर येथे रवाना झाले आहेत. दरम्यान, या चोरट्यांनी चालकांना मारहाण केल्यानंतर त्यांच्याकडून नगदी २० हजार आणि दोन मोबाइलही चोरून नेले होते. याप्रकरणी नेकनूर पोलीस ठाण्यात गुन्हा दाखल करण्यात आलेला आहे.
...
टोळी हाती लागण्याची शक्यता
बिस्कीटचा कंटेनर चोरून नेत असताना बारा ते पंधरा चोरटे असल्याचे जखमी चालकाने पोलिसांना सांगितले आहे. लातूर पोलिसांनी तीन चोरट्यांना ताब्यात घेतले आहे. त्यांच्याकडून अन्य साथीदारांची माहिती विचारली जात आहे. त्यांना देखील ताब्यात घेतले जाणार आहे. दरम्यान, पकडलेल्यांपैकी दोन चोरटे हे बार्शी तालुक्यातील पारा येथील तर एक चोरटा केज तालुक्यातील नांदुरघाट येथील आहे. त्यामुळे मोठी वाटमारी करणारी टोळी ताब्यात येण्याची शक्यता पोलिसांकडून वर्तवली जात आहे.