दीपक नाईकवाडे
केज : तालुक्यातील जिल्हा परिषद शिक्षकांनी ‘केज माझा तालुका, माझी जबाबदारी’ या उपक्रमांतर्गत १५ दिवसांत चार लाख रूपये निधी संकलन करत बनसारोळा येथील कोविड केअर सेंटरला ३ ऑक्सिजन कॉन्सन्ट्रेटरसह इतर आवश्यक साहित्याची भेट दिली. सद्य:स्थितीत तालुक्याची गरज लक्षात घेत या उपक्रमातून शिक्षकांनी सामाजिक बांधीलकी जपली.
ठिकठिकाणी कोविड केअर सेंटरची उभारणी करण्यात आली आहे. या सेंटरमध्ये ऑक्सिजनच्या कमतरतेमुळे अनेक रुग्णांना अडचणी येतात. ही बाब ओळखून केज तालुक्यातील जिल्हा परिषद शिक्षकांनी ‘केज माझा तालुका, माझी जबाबदारी’ हा उपक्रम स्वेच्छेने राबवला. यास तालुक्यातील शिक्षकांनी भरभरून प्रतिसाद दिला. अवघ्या १५ दिवसांत ३०९ शिक्षकांनी ३ लाख ९६ हजार १९१ रुपयांचा निधी स्वेच्छेने जमा केला. या निधीतून ऑक्सिजन पातळी तपासण्यासाठी ५ पल्स ऑक्सिमीटर, १० लीटर सॅनिटायझर, सॅनिटायझरच्या २० छोट्या बॉटल, २० नग एन-९५ मास्क तसेच कोविड केअर सेंटरमध्ये योगा, व्यायामाच्या ठिकाणी म्युझिक सिस्टीम आदी साहित्य खरेदी केले. ते तालुका वैद्यकीय अधिकारी डॉ. विकास आठवले, उपजिल्हा रुग्णालयाचे वैद्यकीय अधीक्षक डॉ. बालासाहेब सोळंके, नायब तहसीलदार सचिन देशपांडे, गटशिक्षणाधिकारी सुनील केंद्रे यांच्या हस्ते सुपूर्द केले.
तालुक्यातील बनसारोळा येथील कोविड केअर सेंटरला दोन तर मानवलोक कोविड केअर सेंटर अंबाजोगाई येथे एक अशा वातावरणातील ऑक्सिजन वेगळे करून त्याचा पुरवठा करणाऱ्या तीन मशीन भेट देण्यात आल्या. केज तालुक्यातील जिल्हा परिषदेचे शिक्षक कोरोनाच्या दुसऱ्या लाटेतही मागील १४ महिन्यांपासून प्रामाणिकपणे कर्तव्य पार पाडत आहेत. या उपक्रमाद्वारे निधी संकलनासाठी संकेत डोंगरे, विष्णू यादव, राहुल काकनाळे, महादेव ढाकणे, बाबासाहेब केदार, राहुल उंडाळे, युवराज हिरवे, किशोर भालेराव, श्रीमंत भोसले, बाळासाहेब चव्हाण, बाळासाहेब गोरे, बाबासाहेब सारुख, बबन राऊत, किसन लोंढे , अरुण पवार यांनी प्रयत्न केले.
यावेळी उपजिल्हा रुग्णालय केजचे वैद्यकीय अधिकारी डॉ. केशव इंगळे, डॉ. करपे, डॉ. सावंत, श्रीकृष्ण नागरगोजे, सह विक्रम डोईफोडे, सुरेश काळे, अर्जुन बोराडे, उद्धवजी थोरात, शृंगारे आदी उपस्थित होते. सूत्रसंचालन आश्रुबा सोनवणे यांनी केले. राहुल काकनाळे यांनी आभार मानले.
===Photopath===
290521\0056deepak naikwade_img-20210529-wa0064_14.jpg