World Badminton Championships 2018 : किदम्बी श्रीकांत सुसाट, उपउपांत्यपूर्व फेरीत दाखल

भारताचा प्रमुख खेळाडू किदम्बी श्रीकांतने जागतिक अजिंक्यपद बॅडमिंटन स्पर्धेत विजयी धडाका कायम राखताना उपउपांत्यपूर्व फेरीत प्रवेश केला.

नानजिंग (चीन) : भारताचा प्रमुख खेळाडू किदम्बी श्रीकांतने जागतिक अजिंक्यपद बॅडमिंटन स्पर्धेत विजयी धडाका कायम राखताना उपउपांत्यपूर्व फेरीत प्रवेश केला. त्याने बुधवारी झालेल्या लढतीत स्पेनच्या पॅब्लो अॅबीयनचे आव्हान 21-15, 12-21, 21-14 असे मोडून काढले. पुढील फेरीत त्याला मलेशियाच्या डॅरेन लिएवचा सामना करावा लागणार आहे. श्रीकांतने पहिला गेम 21-15 असा सहज जिंकला, परंतु स्पेनच्या खेळाडूने दुस-या गेममध्ये दमदार पुनरागमन केले. त्याने 6-6 अशा बरोबरीनंतर खेळातील दर्जा उंचावताना 21-12 अशा विजयासह ही लढत 1-1 अशा बरोबरीत आणली. मात्र, श्रीकांतने तिस-या व निर्णायक गेममध्ये दमदार स्मॅश आणि नेट प्लेसिंगचा खेळ करताना 21-14 असा विजय मिळवला. श्रीकांतला पुढील सामन्यात मलेशियाच्या डॅरनेचा सामना करावा लागेल. डॅरेनने इस्राईलच्या मिशा झिल्बेर्मनचा 12-21, 21-17, 21-10 असा पराभव केला आहे.