कुक्कुटपालनाचा शेतीपूरक व्यवसाय, माजी आमदारांचे मार्गदर्शननांदगाव खंडेश्वर : शेतीलाच एखाद्या पूरक व्यवसायाची जोड दिली, तर गाव सोडून कुठेही चाकरीला जायचे काम नाही, हे ताडून अडगाव बु. येथील शेतकरी युवकांनी कुक्कुटपालन सुरू केले आहे.
नांदगाव खंडेश्वर तालुक्यातील सांसद आदर्श ग्राम अडगाव बु. येथील लाभार्थी मनोज दादाराव खोब्रागडे यांना रोजगार हमी योजनेंतर्गत कुक्कुटपालन करण्यासाठी टीनशेड ग्रामपंचायतीमार्फत बांधून देण्यात आले. तेथील ग्रामरोजगार सेवक मोरेश्वर दिवटे यांनी कुक्कुटपालनासाठी पक्षी उपलब्ध केले. ग्रामपंचायत सदस्य कल्याणी जगदीश दिवटे, प्रफुल परिमल व मंगेश परिमल यांनी संंबंधित लाभार्थींना या व्यवसायासाठी पुढे येण्याचे आवाहन केले आहे.
प्रशासनाने अडगाव बु. हे गाव ‘मी समृद्ध, तर गाव समृद्ध’ योजनेत गाव समाविष्ट करण्याची मागणी मोरेश्वर दिवटे यांनी केली. माजी आमदार वीरेंद्र जगताप यांच्या मार्गदर्शनात गावात सिंचन विहिरी, खचलेल्या सिंचन विहिरी, पांदण रस्ते, २०० घरकुले, वृक्ष व फळबाग लागवड आदी कामे करण्यात आली आहेत. शरद पवार योजनेंतर्गत ‘घर घर गोठा’ उपक्रम राबविण्याची मागणी ग्रामरोजगार सेवक व ग्रामपंचायत सदस्यांनी केली आहे.