बडनेरा (अमरावती) : बडनेरा ते अंजनगाव बारी मार्गालगतच्या मेघे अभियांत्रिकी महाविद्यालयाच्या मागील बाजूस असलेल्या एका शेतातील विहिरीत बिबट्या आढळून आला आहे. श्वानाची शिकार करण्यासाठी त्याने उडी मारली असताना कुत्र्यासह बिबट्या देखील विहिरीत पडल्याची माहिती मिळत आहे.
घटनेची माहिती मिळताच वन विभागाचे अधिकारी आणि कर्मचारी रेस्क्यू टीम तसेच बडनेरा पोलीस घटनास्थळी दाखल झाले आहेत. बिबट्या व श्वानाला विहिरीतून बाहेर काढण्यासाठी प्रयत्न सुरू आहेत. घटनास्थळी बिबट्याला पाहण्यासाठी नागरिकांची मोठी गर्दी जमली आहे.