नगराध्यक्ष, उपाध्यक्ष निवडणूक प्रक्रियेला आजपासून सुरुवात

जिल्ह्यातील ७ नगर परिषदांचे अध्यक्ष व ९ उपाध्यक्ष पदासाठी निवडणुकीची प्रक्रिया १८ जुलैपासून सुरु होत आहे. मोर्शी व दर्यापूर येथील नगराध्यक्ष पद निवडण्ुूकीला न्यायालयाचा स्थगनादेश आहे.

अमरावती : जिल्ह्यातील ७ नगर परिषदांचे अध्यक्ष व ९ उपाध्यक्ष पदासाठी निवडणुकीची प्रक्रिया १८ जुलैपासून सुरु होत आहे. मोर्शी व दर्यापूर येथील नगराध्यक्ष पद निवडण्ुूकीला न्यायालयाचा स्थगनादेश आहे. दर्यापूर येथे उपाध्यक्ष पदासोबतच स्वीकृत सदस्यांसाठी निवडणूक होत आहे. जिल्हा प्रशासनाने या निवडणूक संदर्भात विशेष सभेच्या नोटिशी सर्व सदस्यांना पाठविल्या आहेत.राज्य शासनाने अपुऱ्या मनुष्यबळाचे कारण दर्शवीत नगराध्यक्ष पदाला सहा महिन्यांची किंवा शासन ठरवेल त्या दिवसाच्या अगोदरच्या दिवसापर्यंत मुदतवाढ दिली होती. परंतु शासनाने ही मुदत वाढ रद्द केली. परिणामी नगराध्यक्ष पदाचा कार्यकाळ ५ जुलै रोजी संपुष्टात येत असल्याने या पदांच्या निवडणुकीचा कार्यक्रम जारी केला. परंतु चवथ्यांदाही महिला राखीव आरक्षण असल्याने दर्यापूर येथील प्रकाश चव्हान व मोर्शी येथील प्रदीप कुऱ्हाडे यांनी उच्च न्यायालयाच्या धाव घेतली. यावर नगरविकास प्रशासनाने उत्तर सादर करायला तीन आठवड्यांचा अवधी मागितला. त्यामुळे दोन ठिकाणच्या नगराध्यक्ष पदाच्या निवडणुकीला स्थगनादेश मिलाला आहे. चिखलदरा वगळता अचलपूर, अंजनगावसुर्जी, चांदूर बाजार, वरुड, शेंदूरजनाघाट, चांदूर रेल्वे, धामणगाव रेल्वे या ठिकाणी नगराध्यक्षपदाची निवडणूक होणार आहे. यासोबतच नगराध्यक्षपद निवडणुकीला स्थगनादेश असणाऱ्या दर्यापूर व मोर्शी अशा नऊ नगर परिषदांमध्ये उपाध्यक्षपदासाठी निवडणूक होत आहे. दर्यापूर येथे रिक्त असलेल्या स्वीकृत नगरसेवक पदासाठीही निवडणूक होत आहे.