अमरावती : ठाण्यात येऊन आवाज चढविणे, आरडाओरड करून शासकीय कामात अडथळा आणून ठाणेदारांशी लोंबाझोंबी करून ठाण्यात गोंधळ घातल्याप्रकरणी राजकीय पक्षाच्या महिला पदाधिकाऱ्यांसह १० जणांना पोलिसांनी मंगळवारी अटक केली होती. त्यांना बुधवारी न्यायालयासमोर हजर केले असता, दोन दिवसांची पोलीस कोठडी सुनावण्यात आली.
पोलीस सूत्रानुसार अंबिका ललित अग्निहोत्री (२२, रा. विसावा कॉलनी, ह.मु. माताखिडकी), नेहा रोशन ढेंगे (३०, रा. मुक्ता सेंटर अपार्टमेंटनजीक, रहाटगाव), रुपाली बजरंग कोठार (३०, रा. कुंभारवाडा, महाजनपुरा) ललित रामसंजीवन अग्निहोत्री, भूषण गोविंदराव उईके, सौरभ धीरज निखाडे, सुमित हरिहरराव निखाडे, रोशन कृष्णराव घोरमाडे, राम मारोतराव तायडे, अभिजित अजय हिंगमिरे अशी आरोपींची नावे आहेत. आरोपींविरुद्ध भादंविचे कलम ३५३, १४३, १४७, १४८, १४९, १२० ब, १८६, १८८, १८९, २६९, २७०, २७१, सहकलम २, ३, ४ साथीचे रोग अधिनियम ५१ ब आपत्ती व्यवस्थापन अधिनियम सहकलम १२०, १७०, ११२, ११७, सहकलम ७ शासकीय गोपनियता अधिनियमानुसार गुन्हा नोंदविला.
मुख्य आरोपी अंबिका हिने गैरकायद्याची मंडळी जमवून पोलीस ठाण्यात दोन चारचाकी वाहनांसह आली. सोबत व्हिडीओ कॅमेरा आणला. आरोपी ठाणेदार आसाराम चोरमले यांच्याशी बोलताना अचानक आरोपींना शासकीय कामात अडथळा निर्माण करून ठाणेदारांशी हुज्जत घालून लोंबाझोंबी केली. ठाण्यात गोंधळ घालून घोषणाबाजी केली तसेच ललित अग्निहोत्री याच्या मोबाईलने अंबिका हिने पोलीस स्टेशनच्या कामकाजाचे व्हिडीओ चित्रीकरण करून ते फेसबूकवर पोस्ट केले. ठाणेदार चोरमले यांनी सहकारी पोलीस कर्मचारी यांच्यासमोर आरोपीला ताब्यात घेत असताना त्यांना मरणाच्या धमकी दिली तसेच तुमच्याविरुद्ध विधानसभेत लक्षवेधी लावतो, अशी धमकी दिली होती. या प्रकरणाचा अधिक तपास करण्याकरिता शुक्रवारी पीसीआर वाढवून देण्याबाबत न्यायालयाला विनंती करणार असल्याचे पोलीस सूत्रांनी सांगितले.