अमरावती : राज्याच्या सामान्य प्रशासन विभागाने १५ टक्के बदली प्रक्रिया राबविण्याचा निर्णय दिल्यानंतर ग्रामविकास विभागाने जिल्हा परिषद कर्मचाऱ्यांच्या बदल्यांची प्रक्रिया राबविण्याचे निर्देश दिले आहेत. त्यानुसार जिल्हा परिषदेत १० टक्के प्रशासकीय आणि ५ टक्के विनंती बदल्या ३१ जुलैपर्यंत व त्यानंतर १० टक्के विशेष बदल्या आयुक्तांच्या मान्यतेने १४ ऑगस्टपर्यत पूर्ण करण्याचे निर्देश दिले आहेत. शासनाचे आदेशानुसार जिल्हा परिषद सीईओंनी झेडपीच्या गट ‘क’ आणि गट ड च्या कर्मचाऱ्यांच्या बदल्यांच्या धोरणाची अंमलबजावणी करण्यासाठी १५ जुलै रोजी प्रशासकीय कामकाजाची कार्यसूची जाहीर केले आहे.त्यामुळे मिनीमंत्रालयात बदल्याची धूम राहणार आहे.
दरवर्षी जून पूर्वी बदल्यांची प्रक्रिया पार पडते. मात्र यावर्षी कोरोना संकटाच्या दुसऱ्या लाटेमुळे राज्य सरकारने काही अपवाद वगळता इतर सर्व प्रकारचे बदल यांना ३० जूनपर्यत स्थगिती दिली होती. त्यामुळे मागील वर्षीप्रमाणे यंदाही बदल्या होणार नाहीत असा अंदाज असताना सामान्य प्रशासन विभागाने बदलांबाबत निर्देश दिले आहेत. त्यामुळे ग्रामविकास विभागाने १५ टक्के सामान्य बदल्या करण्याची परवानगी जिल्हा परिषदेला दिली आहे.त्यानुसार जिल्हा परिषदेचे मुख्यकार्यकारी अधिकारी अविश्यांत पंडा यांचे मार्गदर्शनाखाली सामान्य प्रशासन विभागाने बदली प्रक्रियेचे वेळापत्रक जाहीर केले आहे. १६ ते २२ जुलै पर्यत बदली प्रक्रियेसाठीची आवश्यक कारवाई केली जाणार आहे.त्यानंतर २६ जुलै पासून प्रत्यक्ष बदली प्रक्रियेचे समुपदेश होणार असल्याची माहिती आहे.
बॉक्स
बदली प्रक्रियेची कार्यसुची जाहीर
जिल्हा परिषद कर्मचारी बदलीप्रक्रीये करीता संवर्ग निहाय अंतरिम एकत्रित वास्तव्य सेवाज्येष्ठता याद्या तयार करून प्रसिध्द करणे १६ जुलै,विनंती अर्ज स्विकारण्याची अंतिम तारीख १९ जुलै,अंतिम वास्तव्य सेवाज्येष्ठता यादीवर आक्षेप व सूचना मागविणे २० जुलै,आक्षेप व सूचनांचे निराकरण करून अंतिम सेवाज्येष्ठता यादी प्रसिध्द करणे २२ जुलै या प्रमाणे बदली प्रक्रियेची कार्यसूची सीईओंनी जाहीर केली आहे.
बॉक्स
२६ ते २८ जुलै दरम्यान बदल्या ?
जिल्हा परिषदेत वर्ग ३ आणि वर्ग ४ मधील कर्मचाऱ्यांच्या जिल्हातंर्गत बदल्याची कारवाई सुरू केली आहे.१६ ते २२ जुलै पर्यत बदल्यासंदर्भात प्रशासकीय कार्यवाही केली जाणार आहे. यानंतर २६ ते २८ जुलै पर्यत बदली पात्र कर्मचाऱ्यांच्या बदल्याची प्रत्यक्ष कारवाई ही समुपदेशनाव्दारे पार पडणार असल्याचे संकेत आहेत.