संतोषीनगरातून तीन तलवारी जप्त, दोघांना अटक

अमरावती : गुन्हे शाखेच्या पोलिसांनी तलवारी बाळगणाऱ्या दोघांना बुधवारी सायंकाळी संतोषीनगर परिसरातून अटक केली.

अमोल देवेंद्र सूर्यवंशी (३० रा. संतोषीनगर) व महेश अनिल मोहोड (१९ रा. जयसियाराम नगर) अशी आरोपींची नावे आहेत. पोलिसांनी आरोपींकडून तीन लोखंडी तलवारी जप्त केल्या. आरोपी अमोल व महेश यांच्याकडे तलवारी असल्याची माहिती गुन्हे शाखेला मिळाली होती. त्याआधारे पोलीस आयुक्त आरती सिंह व गुन्हे शाखेचे पोलीस निरीक्षक कैलास पुंडकर यांच्या मार्गदर्शनात सहायक पोलीस निरीक्षक जे. एन. सय्यद, राजेंद्र काळे, देवेंद्र कोठेकर, मोहम्मद सुलतान, विशाल वाकपांजर यांनी तात्काळ संतोषीनगर गाठले. मात्र, पोलिसांची चाहुल लागताच दोघेही पळून गेले. त्यामुळे पोलिसांनी आरोपींचा पाठलाग केला. दरम्यान, पोलिसांनी अमोलला त्याच्या घरून अटक केली. घराच्या झडतीदरम्यान दोन तलवारी हस्तगत केल्या. त्यानंतर पोलिसांनी महेशचा शोध घेऊन त्यालाही अटक केली. त्याच्याकडून एक तलवार जप्त करण्यात आली. याप्रकरणी आरोपींविरुद्ध गुन्हा दाखल करण्यात आला असून, पुढील तपास पोलीस करीत आहे.