बनावट रॉयल्टीने वाळूची वाहतूक

नदीतून वाळू उपस्याला मनाई असली तरी बनावट रॉयल्टीने वाहतूक केली जात असल्याची धक्कादायक बाब पुढे आली आहे.

अमरावती : नदीतून वाळू उपस्याला मनाई असली तरी बनावट रॉयल्टीने वाहतूक केली जात असल्याची धक्कादायक बाब पुढे आली आहे. महसूल बुडवून चोरी करायची वाळू तस्करांनी जणू शक्कलच लढविली आहे. बनावट रॉयल्टीने वाळूची वाहतूक करण्याची युक्ती ही महसूल अधिकाऱ्यांनीच दिल्याची माहिती आहे. वाळू तस्करीचे धागेदोरे खोलपर्यंत असल्याने लहान-सहान अधिकाऱ्यांना ती थांबविणे कठीण आहे. नदी पात्रातून वाळू उपस्याला मनाई असताना चक्क जेसीबीने वाळू उपसा होत असेल तर हा प्रकार थांबविणार कोण? हा सवाल उपस्थित होत आहे. वाळू तस्करीचे मार्ग बदललेअमरावती : एकीकडे वाळू उपसा बंद असल्याचा देखावा करुन मोठ्या प्रमाणात वाळू वाहतूक करुन महसूल बुडविण्याचा धंदा तस्करांनी चालविला आहे. नदी पात्रातून वाळुचा उपसा करुन ही वाळू वाहतूक करताना ती साठवून ठेवलेली आणली जात आहे. याकरीता वाळू तस्करांनी बनावट रॉयल्टी ट्रक चालकांजवळ देण्याची शक्कल लढविली आहे. ही बनावट रॉयल्टी सोबत असली की एखाद्या अधिकाऱ्यांने वाळुची वाहतूक करताना वाहन तपासले तर ती दाखवून वाहतूक करणे सुकर होते. हा प्रकार जिल्ह्यात राजरोसपणे सुरु आहे. नदी, नाल्यातून वाळू उपसा करुन चढ्या दराने वाळू विकण्याचा प्रकार महसूल विभागाला रोखणे दुरापास्त झाले आहे. वाळू तस्कर दरदिवसाला नवनवीन क्लुप्त्या लढवून महसूल विभागातील अधिकाऱ्यांवर ‘नहले पे दहला’ अशी खेळी करीत वाळू वाहतूक बिनधास्तपणे करीत आहेत. जिल्हा खनिकर्म अधिकाऱ्यांची स्वाक्षरी व जिल्हाधिकारी कार्यालयाचा शिक्का असा रॉयल्टीत उल्लेख असणे अनिवार्य आहे. मात्र हल्ली वाळू तस्करांनी नदीपात्रातून वाळू उपसा करुन ती वाहतूक करताना बनावट रॉयल्टी देण्याचा धंदा सुरु केला आहे. या अफलातून प्रकाराने वाळू तस्करीतून लाखो रुपयांचा महसूल बुडत आहे. एवढेच नव्हे तर क्षमतेपेक्षा जास्त वाळू आणून महसुल बुडवित असताना महसूल अधिकारी या गंभीर बाबीकडे डोळेझाक करीत आहेत. त्यामुळे या गंभीर विषयाकडे प्रशासकीय यंत्रणेने लक्ष देण्याची गरज निर्माण झाली आहे. (प्रतिनिधी)