पान २ ची लिड
चांदूर बाजार : संकटांचा सामना करीत शेती व्यवसाय करणे हा शेतकऱ्यांच्या जीवनाचा अविभाज्य अंग आहे. नुकत्याच खतांच्या किमती वाढल्याने शेतकऱ्यांसमोर नवे संकट निर्माण झाले आहे तसेच इंधन दरवाढीने उत्पादन व वाहतुकीच्या खर्चात होणारी वाढ याची आर्थिक झळ शेतकऱ्यांना सोसावी लागत आहे. इंधन दरवाढीचा शेती व्यवसायावर थेट परिणाम होत असून, शेतकऱ्यांना याचा सर्वाधिक फटका बसत आहे. यामुळे शेतकरी मेटाकुटीस आला आहे.
दोन महिन्यांत पेट्रोलच्या सतत वाढणाऱ्या किमतीने सामान्यांची परवड होत आहे. पेट्रोलचे दर महाराष्ट्रात आजमितीला ९८.६८ रुपयांच्या घरात पोहोचले आहेत, तर डिझेल ८९ रुपयांच्या आसपास आहे. प्रथमदर्शनी पेट्रोल-डिझेलच्या वाढत्या किमतीचा थेट परिणाम सर्वसामान्य, गरीब, मजूर वर्गासोबतच शेतकरी व लघू उद्योजकांवर झाल्याचे बघायला मिळत आहे. असे असून वाहतूक खर्च वाढल्यामुळे भाज्या, दूध व फळे या वस्तूही महाग होत आहेत. गेल्या वर्षीसुद्धा लॉकडाऊनच्या काळात सगळे काही ठप्प असताना इंधनाच्या दरात मात्र अनेकदा वाढ झाली होती.
इंधन दरवाढीचा बोजा अगदी तळातील माणसापासून तर कर्मचाऱ्यांपर्यंत सर्वांनाच बसतो. ही झळ इथेच थांबत नसून, जीवनावश्यक वस्तूंच्या किमतीतही वाढ होत आहे. परिणामी फळे, भाज्या, शेतीशी निगडित संसाधने, खते, कीटकनाशके आणि इतरही जीवनावश्यक वस्तूंच्या किमतीतील वाढ होत आहे. आजच्या जीवनशैलीतील तसेच शेतकामात ट्रॅक्टर महत्त्वाची भूमिका बजावतात. मात्र, डिजलचे दरही मोठ्या प्रमाणात वाढल्याने शेतीव्यवसाय खर्चीक झाला आहे. त्याचे परिणाम सर्वसामान्य जनतेला दिलासा देणारे नक्कीच नाही.
बॉक्स अशी झाली दरवाढ
इंधन दरवाढ विशेषतः पेट्रोल-डिझेलच्या किमतीमध्ये झालेल्या दरवाढीचा परिणाम थेट शेतीसंबंधी व्यवसायावर जाणवू लागला आहे. आजच्या आधुनिक युगात शेतीची सर्वाधिक कामे ट्रॅक्‍टरच्या साह्याने केली जात असून, इंधन दरवाढीमुळे संबंधित शेती संसाधनांच्या भाड्यातही दरवाढ लागू झाली आहे. शेतात व्ही-पास मारण्याचा खर्च ६५० रुपये प्रतिएकर, ५५० रुपये फंटन (पंजी), १००० ते १५०० रुपये रोटावेटर तसेच नांगरणीचा खर्च १३०० रुपये प्रतिएकर असा झाला आहे.