अमरावती : कोरोना बाधितांची वाढती संख्या लक्षात घेता, संचारबंदी लागू केलेली असतानाही विनाकारण फिरणाऱ्यांची आता खैर नाही. अशांची वाहने जप्त करण्याचे आदेश जिल्हाधिकारी शैलेश नवाल यांनी दिले आहेत. याशिवाय पेट्रोल पंपावरही आता ‘नो मास्क, नाे पेट्रोल’ असे धोरण राबविण्यात येणार आहे. विविध संघटनाही प्रशासनाच्या प्रयत्नांना साथ देण्यासाठी पुढे येत असल्याचे त्यांनी सांगितले.
जिल्हाधिकाऱ्यांनी बुधवारी पेट्रोल पंपचालक संघटनेशी बैठकीत चर्चा केली. यावेळी जिल्हाधिकाऱ्यांच्या आवाहनाला प्रतिसाद देत संघटनेने मास्क नसलेल्या व विनाकारण फिरणाऱ्या नागरिकांना पेट्रोल व डिझेल न देण्याचा निर्धार व्यक्त केला. सर्व पंपावर त्यासाठी फलकही लावण्यात येतील. अत्यावश्यक कारणांसाठी बाहेर पडणाऱ्यांना पेट्रोल देण्याचा प्रयत्न असल्याचे अध्यक्ष नरेंद्र मेहता यांनी सांगितले. यावेळी सचिव सौरभ जगताप, सदस्य अखिलेश राठोड आदी उपस्थित होते.
पोलीस प्रशासनाकडून नाकाबंदी, फिक्स पॉईंट व पेट्रोलिंग वाढविण्यात आले आहे. शहरात पोलीस आयुक्त आरती सिंह यांच्यासह विविध पोलीस अधिकारी नाकाबंदी व फिक्स पॉईंटला भेटी देऊन ठिकठिकाणी तपासणी करीत आहेत. हॉटेलमधून पार्सलची मुभा देण्यात आली आहे. मात्र, या सवलतीचा गैरफायदा घेऊन लॉकडाऊनचे उल्लंघन करताना काही नागरिक दिसून येत आहेत. स्वत:सह इतरांचा जीव धोक्यात घालणे अत्यंत चुकीचे व समाज विघातक आहे. त्यामुळे नियमांचे उल्लंघन करणाऱ्यांवर दंडात्मक कारवाईसह वाहन जप्तीची कारवाई करण्याचा, तसेच आपत्ती व्यवस्थापन कायद्यान्वये गुन्हा दाखल करण्याचा इशारा पोलीस आयुक्तांनी दिला आहे.