लोकमत न्यूज नेटवर्क
अमरावती : वरूड तहसील कार्यालयात शिरून तहसीलदारांना शिवीगाळ, मारण्याची धमकी व माईक फेकून मारून शासकीय कामकाजात अडथळा निर्माण केल्याप्रकरणी मोर्शी मतदारसंघाचे विद्यमान आमदार देवेंद्र भुयार यांना स्थानिक न्यायालयाने तीन महिने कारावासाची शिक्षा सुनावली आहे. भुयार आमदार नसतानाचे सन २०१३ मधील हे प्रकरण आहे. जिल्हा न्यायालय क्रमांक १ चे न्यायाधीश एस. एस. अडकर यांनी सोमवारी हा निर्णय दिला.(Devendra Bhuyar)
विधीसूत्रानुसार, २७ फेब्रुवारी २०१३ रोजी तत्कालीन तहसीलदार राम लंके हे वरूड तहसील कार्यालयात शासकीय कामकाज करत असताना देवेंद्र भुयार हे काही लोकांना घेऊन सभागृहात आले. बाजार समितीमधील शासकीय ज्वारी केंद्र बंद का आहे, फोन का काटला, अशी विचारणा करून भुयार यांनी आपल्याला अर्वाच्च शिवीगाळ केली. त्यांनी माईकदेखील फेकून मारल्याची तक्रार लंके यांनी नोंदविली होती. त्यावरून गुन्हा दाखल करण्यात आला. दोषारोपपत्र दाखल करण्यात आले.
युक्तिवादादरम्यान, शासकीय कामकाजात अडथळा हा गुन्हा सिद्ध झाल्याने न्यायालयाने त्यांना तीन महिने सक्तमजुरी, १५ हजार रुपये दंड, दंड न भरल्यास एक महिना साधा कारावास, भादंविचे कलम २८४ अन्वये दोन महिने सक्तमजुरी, १० हजार रुपये दंड, दंड न भरल्यास १५ दिवस साधा कारावास व कलम ५०६ अन्वये तीन महिने सक्तमजुरी, १५ हजार रुपये दंड, दंड न भरल्यास एक महिना साधा कारावास, अशी शिक्षा सुनावली. तीनही शिक्षा एकत्रितरीत्या भोगावयाच्या आहेत. दंडाची रक्कम वसूल झाल्यानंतर नुकसानभरपाई म्हणून राम लंके यांना १० हजार रुपये देण्याचा आदेशदेखील न्यायालयाने दिला. अभियोक्ता सुनित घोडेस्वार यांनी सरकारी बाजू मांडली.