चांदूर बाजार : तालुक्यातील ब्राह्मणवाडा थडी ग्रामपंचायतीवर प्रजासत्ताक दिनानिमित्ताने ध्वजारोहण करताना प्रशासक व सचिवाच्या गलथान कारभारामुळे उलटा झेंडा फडकला. मात्र, ही चूक ४० वर्षांपासून झेंडा बांधणाऱ्या कर्मचाऱ्यांकडून पहिल्यांदा झाल्याची कबुली गटविकास अधिकारी प्रफुल्ल भोरगडे यांनी दिली. मात्र गावातून अद्याप कोणतीच तक्रार प्राप्त न झाल्याने कारवाई थंडबसत्यात अडकली असल्याची चर्चा नागरिकांमध्ये सुरू आहे.
तालुक्यातील ब्राह्मणवाडा थडी येथे प्रजासत्ताकदिनी ग्रामपंचायतीच्या प्रांगणात ग्रामपंचायतचे प्रशासक व विस्तार अधिकारी नारायण आमझरे यांनी ध्वजारोहण केले. यावेळी राष्ट्रध्वज उलटा फडकल्याचे दिसून आले. नंतर उपस्थितांच्या ही बाब लक्षात येताच तात्काळ उलट फडकलेला तिरंगा खाली उतरवून पुनश्च सरळ करून फडकविण्यात आला. मात्र, प्रशासक व ग्रामसेवकांनी याप्रकरणी जाहीर माफी मागितल्याने स्थानिक पोलिस स्टेशन मध्ये कोणतीही तक्रार झाली नाही.
याप्रकरणी गटविकास अधिकारी प्रफुल्ल भोरगडे यांना विचारणा केली असता, त्यांनी कोणतीच लेखी तक्रार प्राप्त नसल्याचे सांगितले. ४० वर्षांपासून ग्रामपंचायतीवर ध्वजारोहणासाठी झेंडा बांधण्याचे काम करणाऱ्या कर्मचाऱ्यातर्फे अनावधनाने हा प्रकार घडल्याची शक्यता गटविकास अधिकारी भोरगडे यांनी वर्तवविली. मात्र, कोणतीही तक्रार प्राप्त न झाल्याने असा प्रकार घडला की नाही याला दुजोरा दिला नाही.
मात्र, उलटा तिरंगा फडकल्याचे छायाचित्र तसेच व्हिडिओ सोशल मीडियावर व्हायरल झाल्यामुळे तिरंगा उलटा फडकला, हे सिद्ध होत असले तरी अद्याप प्रशासक नारायण आमझरे व संबंधित कर्मचाऱ्यांवर कोणतीच कारवाई झालेली नाही. त्यामुळे राष्ट्रध्वजाचा अपमान करणाऱ्या अधिकारीची पाठराखण केली जात असल्याची तालुक्यात चर्चेला उधाण आले आहे.