अमरावती : सासऱ्याने सुनेवरच वाईट नजर ठेवल्याची बाब महिलेने पती व सासूला सांगितली. मात्र, या गंभीर प्रकारला पती व सासूने विरोध न करता उलट घरातील गोष्ट घरातच ठेव, अन्यथा जीवाने मारून टाकेन, असे म्हटल्याची धक्कादायक घटना चांदूरबाजार तालुक्यातील शिरजगाव येथे घडली. याप्रकरणी सासरच्या मंडळीविरुद्ध गाडगेनगर पोलिसांनी गुन्हा नोंदविला. ही घटना २० फेब्रुवारी २०२० पूर्वी घडली.
पोलीससूत्रानुसार, निर्भयसिंग केदारसिंग रघुवंशी (३३, पती), केदारसिंह राजारामसिंह रघुवंशी (५५ सासरे), दोन महिला, अतुलसिंग राजारामसिंह रघुवंशी (४२, सर्व रा. लोहान महाजनवाडी राजापेठ) रघुवंशी प्लॉट अमरावती), चंद्रकांत रतेशसिंग रघुवंशी (४३, रा. येवदा ता. दर्यापूर) अशी आरोपींची नावे आहेत. यातील २४ वर्षीय तक्रारदार महिलेचे निर्भयसिंगसोबत ४ फेब्रुवारी २०२० रोजी लग्न झाले. १५ दिवस सदर महिलेला चांगले नांदवले. मात्र, हुंडा दिला नाही म्हणून सासरच्या मंडळींनी महिलेचा शारीरिक व मानसिक छळ चालविला. दोन लाख रुपये माहेरहून आणण्याचा तगादा लावून महिलेला मारहाण करण्यात आली. यातील आरोपी सासरा हा वाईट नजरेने बघत असल्याची तक्रार तिने पती व सासूकडे केली. मात्र, याकडे दुर्लक्ष करीत घरातील गोष्ट घरातच ठेव, अन्यथा जीवाने मारून टाकेन, अशी धमकी दोघांनही विवाहितेला दिली. त्यानंतर तिने हा प्रकार माहेरच्या लोकांना सांगितला. नंतर सदर प्रकरण पूर्वी महिला सेलकडे गेले. तेथे समेट घडून न आल्याने अखेर पोलिसांनी भादंविचे कलम ४९८(अ), ३२३, ५०४, ५०६, ३४ अन्वये गुन्हा नोंदविला. पुढील तपास पीएसआय मनीषा सामटकर करीत आहेत.